《易經》．第十一卦　【泰】天地泰　     坤上乾下

泰：小往大來，吉亨。

呢個卦的卦詞就係小往大來，我地最緊要留意，在易經裏面講好多先後，小大，來往，返復呢類的字眼，千祈米睇小或者忽略呢類字眼，因為呢一類字眼係好重要的。泰就係地天泰，呢個泰，如果照孔子的思想，就認為係一個非常好的卦，因為儒家最主張的就係中和，中庸之道，平衡，呢個卦就平衡到極，三個陰爻，三個陽爻，陰上陽下，平衡之中點解地在上而天在下呢，正常應該天在上，地在下先至啱的，點解咁得意呢，照儒家解釋就係陽氣在下面遂爻遂爻咁樣升上去，即係話個陽氣重有發展的餘地，因為卦爻係由下開始向上數的，現在個陽氣升到第三爻，佢重有機會升到上去第四爻，第五爻，甚至上爻位都得的，儒家的中庸之道就唔鐘意一升就升到盡，一跳跳到盡就唔得中和，因此就留有發展的餘地，所以唔係睇卦象，係睇個爻的陰陽，爻的陰陽就叫消息，息就係生長，消就係收藏，現在呢一個陽爻一路路生長，個陰爻就一路消，個陽爻重有息的機會，個陰就一路消，因此儒家就認為呢個係一個好的卦，平衡得黎有前途，所以呢個泰卦就小往大來，乜野係小往大來，支出去的小，番黎的多，就叫小往大來，能夠小往大來，能夠小往大來就因為個陽一路息，一路生上去，當陽息陰消的時候，會有小小的損失，但係總括黎講係有著數的，就小往大來，你占到泰卦無論係邊一爻都要留意小往大來，呢個係泰卦的綱領，每一個卦你一定要知道佢的綱領係邊一度，個卦主就係九二，呢個九二雖然在低位，但係同六五應，陽同陰相應，雖然陽爻唔得位，因為陽性上升，所以同六五陰相應，陰陽相交萬物生，所以吉亨。

彖曰：泰．小往大來．吉亨．則是天地交，而萬物通也；上下交，而其志同也。

　　內陽而外陰，內健而外順，內君子而外小人．君子道長，小人道消也。

同否卦相反，否係負面的，所以天地不交，大往小來，無利可圖，但泰就相反，泰係正面的，小往大來，付出小小而收獲多多，一間舖頭有泰卦出現就會出現Ｄ無用的人離開，讓的有用的人入黎，即係清除Ｄ淤血，所以吉，前途無阻，就亨，天地交，即陰陽調和，萬物通，上下交，而其志同也，即係和氣，上下一條心，就係其志同，以卦象黎睇上坤為陰，下乾為陽，陰氣下降，而陽氣上升達到陰陽調和目的，就係上下一心，就係志同，內陽而外陰，內健而外順，表示和而不同，即係你的意見我唔反對，但我唔同意，亦即係包容不同的意見，即係容納，呢度唔係表示奸，並唔係表面同意，內心反對，亦唔係陽奉陰違，因為內陽，內心正當，內健而外順，乾代表健，坤代表順，乾代表君子，坤代表小人，君子道長，小人道消，乾卦陽爻一路路向上升，不斷膨脹，將坤卦小人迫離自己的範圍，所以道長。

象曰：天地交．泰．后以財成天地之道．輔相天地之宜，以左右民。

天地交，唔同意見的人消除左Ｄ岐見，唔使面左左，大家都好舒服，就泰．后，呢個后唔係先後個後，而係領導人咁解，財即係栽，大家無晒不同的意見，就由領導人重新分配工作，以前大家意見多多，你唔妥我而我又唔妥你，但係現在唔同勒，大家無晒歧見，所以由呢一個后，領袖重新分配職位，輔相天地之宜，以左右民，天地之宜，有Ｄ係好大件事，所以要搵Ｄ叻的人，以左右民，係一班人中揀Ｄ好的出黎。

占到呢一卦，問前程：就表示一路路好，但係有風唔好駛到盡，要保持中庸之道，唔好急進．

問婚姻：就唔會一帆風順，只可以慢慢來，急唔黎．

問事業：就要同Ｄ唔同意見的人合作，就會成功，同一口徑或同一專長就會很辛苦，因為呢度陰陽交，要唔同的專長溶合埋一齊就會成功。

初九：拔茅茹，以其彙，征吉。

呢個彙應讀猬，剌猬個猬，古人一直將呢個字讀做猬，証實係有根據的，因為馬王堆出土的漢帛書都註明係讀猬。乜野係拔茅茹，茹就係草根，現在重有的，在中葯舖Ｄ竹茹，就係竹根，嫩竹的根，茅茹就係茅的根，抆條茅草連根都抆起，果Ｄ根鬆起晒，好似隻剌猬咁樣，所以就話拔其茅茹，以其猬，以：似，好似隻剌猬，直情係拮手的。征吉，出行就吉勒，成句的解釋就話改變環境就吉勒，點解改變環境就吉呢，因為連根都抆起，所有關係都離開晒，去一個新的環境，因為呢卦的要意義係小往大來，初初係有所損失，但係慢慢就有大收獲，呢個係成個卦的綱領，有的書解做抆起Ｄ茅草的根，又將佢分類，係唔啱的。又有Ｄ書解做Ｄ茅草的根相互糾纏，抆起一條根就連帶周圍果Ｄ都抆起晒，咁樣就團結一齊去安邦救國，簡直攪笑，本本書都將每一卦每一爻都解成忠君愛國，點樣保護國君，唔疲倦嗎？唔覺得悶咩，所以盡信書不如無書，睇下個象詞。

象曰：拔茅征吉，志在外也。

睇埋呢個象解己經好清楚，征吉就要拔茅茹，點解佢要離開就好，因為志在外也，呢度成個卦係講陰陽交替，改變就係好的。

占到呢一爻問前程：

問婚姻：

問事業：

九二：包荒，用馮河，不遐遺，朋亡，得尚於中行。

包：刨。馮：憑，憑河．後世有憑河之勇，即係就咁就過河，完全旡裝備，靠一股蠻勁。遐：戰馬。

呢度有兩個讀法，一個就係頭先的讀法，另一個就係：包荒用馮河，不遐遺，朋亡，得尚中行。呢個包字讀刨音，但係呢，就有人讀抱音，刨同抱音呢個爭論由明朝初己經一路有爭論，究竟讀刨或抱呢，就全靠Ｄ出土文物，結束左呢個爭論，馬王堆出土的漢帛書就寫呢個木字邊個包，就係枹字，就變成左枹荒，經過印証之後，應讀係枹荒，音就不妨讀刨，但係解釋就絕對唔係包，有Ｄ書解釋為包就係包容，荒就係荒廢之物，即係污穢之物，變成包容Ｄ唔乾淨的事，如果係73年以前寫的書，就情有可原，但係曲解就罪無可恕，但係那些90年代之後所寫的書仍然用番舊有字眼或讀音，而不加註明，簡宜就係抵死，証明真係天下文章一大抄，真係無講錯，一味因循苟且，唔去接收新的資訊，亦都唔肯改變自己舊有觀念，更加唔肯認自己有錯。講番呢個包字，刨或者枹用國語黎讀就好接近，刨荒，刨就係抱，後來先至發展到剔手邊，乜野係荒，荒即係一堆草，重要係亂草，即係一堆亂草就叫荒，一般叫荒原就係長滿亂草的荒野，話呢個地方好荒蕪，就係呢個地方或者呢個花園長滿亂草，用憑河就係咁樣靠佢過河，無過河的工具，以前過河就係攬住一個大的壼蘆瓜過河的，但係現在連瓜都無，就只有攬住Ｄ草都好啦，因為Ｄ草有浮力，而且浮力好好，如果唔係就點會有一葦渡江呢個名詞，刨荒用憑河就係攬住一扎茅草過河，不遐遺，遐係乜，好靚的戰馬就叫遐，係要黎打仗的戰馬，不遐遺，無遺失果隻戰馬，成個畫面就係一手攬住一扎芧草，一手拉住隻戰馬過河。朋亡，同你一齊過河的戰友就做唔到勒，佢地遺失左隻戰馬，得尚於中行，呢一個尚就係賞，即係獎賞，因為你刨荒用憑河，不遐遺，所以就得尚於中行，就得到中行的將賞，乜野叫中行，呢度就要明白古代的兵法制度，古代行軍就分三行，左中右，右左兩行係馬車，中間係騎兵，中行，復卦裏有中行獨復之句，現在呢度得尚於中行，點解要中行的賞呢，因為中間係最大的，左右都係戰車，保護中間的中行，受保謢的通常係最大的，你用憑河不遐遺，所以得到最大果個的獎賞，但係朋亡，同你一齊過河的戰友就唔得勒，佢地就失左隻戰馬。

象曰：包荒．得尚于中行．以光大也。

經過咁艱難的過程，抱住的茅草黎過河，而無損失，得到上頭的讚賞，周圍講俾人聽，好開心。

占到呢一爻問前程：就唔好以為好順利，進行事情你就知道刨荒用憑河，你過河過得好辛苦，不過就無唔見左隻馬，無損失，所以就得賞，每完成一件事都要經過艱難，不斷咁接受挑戰，表示前程係好多荊棘的，所以一定要識解個爻詞先至可以占卦占得準的．

問婚姻：就唔樂觀，因為長輩唔同意，但如果係經過波拆的婚姻或者係第二次就會好的。

問事業：就唔好同人合作，因為得尚于中行，只係一個人的事，主要原因就係朋亡，你的同伴係做唔到你的野，所以合作係無好結果的。

九三：無平不陂，無往不復，艱貞無咎，勿恤其孚，于食有福。

乜野叫做無平不陂，無往不復，無平地就顯唔出一個高的山陂，等於廣東話重有句俗語保留住，無高山就顯唔出平地，呢句廣東話唔知你地重有旡講。無高山就唔覺得平地相差咁遠，呢度就相反，無平地就顯唔出高山，無往不復，唔出門就無得返屋企，唔去又邊有得返呢，呢兩句的意思就係一種比較，任何事都要進行，唔去就無得返，唔進行就無得完成，呢兩句的意思就表示唔係太吉利，無平地就顯唔到有高山，係相對性，並不是絕對性，因為後面跟往艱貞，事情進行中係好艱難的，但係艱難唔緊要，貞無咎，艱難的時候好長，但係唔緊要，因為你高山都可以行過，所以你捱得住，就係咁樣所以無咎。勿恤其孚，于食有福，乜野係勿恤其孚，唔好失去你的信心，于食有福，如用廣東話黎講就係好食神，好食神的意思就係去到度度都有得食，亦都代表咗你的人緣好好，所以唔好失去你的信心，因為你有好的食神。我地現在睇易經，有一樣要注意的，就係唔好睇少個食字，唔好將我地呢個年代同古時相比，現在食個漢堡包都話膽固醇過高，苦口苦面，在商周時代食係一件好大的事，民生最大件事就係食，國家領導人最大件事就係打仗，領導人最大件事就係點樣去侵佔別人的土地或點樣，唔俾人侵佔自己的土地，因為當時的天然災難好多，人口或者牲口不斷損失，所以亦要不斷補充，呢Ｄ就成為領導人的重任，但係人民就唔同，佢地最緊要的事就係食，所以有餐食或者有餐好野食係好難的，唔信可以睇下孟子點樣教佢Ｄ學生，話你地養父母到佢地70歲，就要俾肉佢地食呀，養親70歲先至可以食肉，即係69歲都唔會有肉食，70歲重要老師教先至俾肉個父母食，由此可知食肉真唔容易，現在就唔同，有肉食都嫌三嫌四，所以呢一爻話于食有福，你好食神架，你唔好失去你的信心，即係話你可以繼續進行呢件事。

象曰：無往不復，天地際也。

唔去就唔會返，唔做就點會成功呢，天地際，現在所企的位置係陽的盡頭，陰的起點，陰陽的邊界，即係過呢一邊就陽，過呢邊就係陰，即係睇吓你點樣決定呢件事。

占到呢一爻問前程：就知道唔係咁順利，又要上高落低，來來往往，先至可以做成一件事，真辛苦。

問婚姻：就多波折，但係唔好氣餒，你始終都會成功的。

問事業：就係多勞少成。

六四：翩翩，不富以其鄰，不戒以孚。

以：受到影響。以其鄰：即係受到隔離影響。孚：誠信。

翩翩即係好好姿勢，好有形，好開心的姿態，點解都唔富呢，以其鄰，俾隔離鄰舍令到你唔富，點解隔離鄰舍會令到你唔富呢？原來俾人偷晒Ｄ野，你搵幾多俾隔離偷幾多，不戒以孚，因為相信咗隔離，就唔會對隔離有戒心勒，孚就係信，你點解無防備隔鄰偷你野，以孚，因為你對人地有信用，以為人地都有信用，以為隔離唔會偷野的，所以就無防備，Ｄ野俾人偷晒，行出黎就有型有款，屋企就窮到燶，屋企點解會窮到燶，因為俾隔離偷晒Ｄ野。古代的富係乜野，就係粮食，同埋臘起Ｄ野獸的肉，臘起的魚，係易經裏面有講魚乾的，有魚乾食係好好的，因為打獵唔係次次得手的，所以糧食係當時最大的財富，在周代己經發展到農業，而遊牧業同畜牧業，己經漸漸受淘汰，打獵並不是每次都有收獲，畜牧業並不是隨時劏羊，劏牛，一般都要到有大祭祀的日子先至劏牛，劏羊，所以食一餐肉唔係咁容易，獵物就係一家人的財富，如果俾人偷左就喊都無謂，咁樣就不富，翩翩不富，以其鄰，不戒以孚，就係話你信錯咗人，正常係可以信的，但係可信的反而變成不可信。

象曰：翩翩不富，皆失實也，不戒以孚，中心願也。

點解會不富，因為隔離偷我的野，失實，知人口面不知心，不戒以孚，不戒，有人勸我但係我唔聽，中心願也，我認為自己好啱。成句就係因住佢會偷你Ｄ野呀，佢個老實樣係裝出黎架咋。但係你唔信，重認為咁大疑心係唔啱的，佢係好人黎的。

占到呢一爻問前程：就一定要步步為營，不要無條件的相信他人，同時以為最值得相信的人就更要小心．

問婚姻：就一定要接受長輩的意見，唔好死牛一邊頸，如果唔聽就一定無好結果的。

問事業：就表示內部有問題，即刻就要檢討，或者轉呔。

六五：帝乙歸妹，以祉元吉。

全個卦最好一爻，帝乙係乜，帝乙係人名，乜野人的名，就係商朝紂王個老豆，即係坦己個老爺，當時的人改名多數都係睇吓在邊一年出世，就用果一年的天干做名，呢一種改名法係商代的習慣，所以商朝有一個王帝叫做武丁，因為佢係丁年出世，武丁就係帝乙的老豆，而帝乙就係紂王的老豆，佢係乙年出世，因為佢係王帝，所以叫做帝乙，商朝去到帝乙手上，國勢開始弱，當時在西方有一個叫做岐的地方，有一個民族興起，呢個就係周民族，開始唔聽話，唔聽中央說話，威脅到帝乙，所以帝乙用和婚法，使出一段政治婚姻，將個女嫁俾周文王，周文王個老婆就係帝乙個女，後來周文王去打紂王就係打個大舅，原來大家係親戚，但係為咗霸權，就唔會理會親唔親戚，所以我地讀歷史，千祈唔好俾Ｄ封神榜影響，將紂王當得咁衰，因為封神榜裏面講到紂王衰到極，周文王就係天下第一好人，其實只不過係兩個民族的鬥爭，根本無所謂好人壞人，紂王未必壞到咁緊要，但係後來Ｄ人將Ｄ罪名推晒在坦己身上，後來諗真下，一個女人唔似咁叻，就將坦己講成係狐狸精，有法力，所以先至咁犀利，實在邊有咁多精，睇真Ｄ其實紂王只不過充其量係一個花花公子，佢老豆留落黎個檔攤己經弱晒，佢就聽左當時的所謂忠臣閔太師的說話，襯周文王黎朝見之時，將周文王扣留，扣留咗個妹夫，咁周民族就真係唔敢郁，因為自己個猶長俾人扣留。後來周武王買通咗紂王身邊的奸臣，放左周文王，將個妹夫放番去，紂王一生就做錯咗呢一件事，周文王就起兵打紂王，重要聯合其他諸侯一齊伐紂，但係紂王重有一個妹夫，崇克虎，呢個崇克虎在封神榜裏面好有名，呢個崇克虎因為幫紂王，所以就變咗壞人，於是乎就有黃飛虎反五關，講到紂王不知幾壞，其實睇晒成本商周歷史，紂王都幾可憐，佢只不過係花花公子一名啫，因為帝乙果陣時國勢已經開始弱，佢只不過想享下父蔭啫，又話佢酒池肉林，窮奢極侈，以前都有講過呢個酒池，其實當時個個都有個酒池的，絕不豪華，因為當時的酒池要黎藏酒的，如果現在的泳池載酒紅酒就可以稱豪華，呢度的帝乙歸妹，以祉元吉又係乜呢，呢度就廣東人先至識解的，好多書都攪笑，寫成嫁妹，其實係嫁女，廣東人叫自己個女多數都會叫妹，所以呢度的歸妹應讀成歸妹。事實係嫁女，唔係嫁妹，以祉元吉，照一般的解釋係為因為佢有福氣，所以呢段婚姻就大吉勒。

呢個祉就係福氣，但係根據馬王堆出土的易經就有另一個解釋，佢寫成以齒元吉，牙齒的齒，咁樣解法就唔同勒，齒係乜野，年齒，以前要知道隻馬隻牛幾多歲，就要睇下佢有幾多隻牙，就知道幾多歲，所以叫做齒，後來D人自謙話自己年紀大而无乜用就話馬齒徒增，以齒就係跟住個大細年齡黎嫁，先嫁大女，再嫁二女，三女，咁樣就叫以齒，順次序，照年齡跟住嫁就大吉，帝乙嫁女，照年齡大小去嫁，元吉，就大吉勒，呢一個解釋就啱Ｄ，因為同歷史吻合，點解呢個解釋啱呢，呢一爻話以齒元吉，順次序就好勒，但係帝乙並無順住次序將Ｄ女嫁出去，佢將個細女先嫁俾個諸侯崇克虎，之後將個大女嫁俾周文王，以為將兩個女嫁晒俾兩個大諸侯，以為好穩陣，點知其中一個女婿，周文王唔鐘意，呢個女婿就作佢反，佢就錯在唔以齒，帝乙先嫁個細女俾崇克虎，再將個大女嫁俾周文王，周文王就唔高興，點解，因為係老女，再加上呢個老女嫁入黎之後無仔生，於是乎再娶埋一堆姬妾，個個都有仔生，係佢無得生，點解佢無得生，因為佢老咗，一嫁周文王就唔高興，但係如果掉轉將個大女嫁俾崇克虎，將個細女嫁俾周文王，可能現在成個中國歷史改寫，就唔會有周文王作佢反，無左呢場戰爭，可能我地現在都重係商民族的後代，重用緊商民族的文化，所以呢個世界好“橋”，領導人的一個唔覺意的決定就影響到後世幾千年，現在商文化去咗邊呢，就係去咗朝鮮，無論服裝，大男。

第十三頁 第十一 地天泰

人主義都係商朝的翻版，朝鮮人所保留的全部係商民族的文化，見到朝鮮服裝就係當時的商朝服裝，放眼望其他國家都好重視自己的傳統，唔好講歐洲國家，就講日本，對佢自己的傳統極之重視，但中國人就．．．．

象曰：以祉元吉．中以行願也。

呢一卦的互卦係歸妹，所以講到嫁女的時候就取名歸妹，有Ｄ野係要順住次序去做，就得到福祉，中以行願也，希望佢地幫自己，呢個以齒係有目的的，但係元唔元吉就唔知．

占到呢一爻問前程：就表示要做決定之前一定要深思熟慮，唔好錯，錯親就影響好大．

問婚姻：就千祈唔好爬頭，一定要順序，家姐唔嫁千祈唔好嫁住．

問事業：就要用手段，親信反而不足相信。

上六：城後于隍．勿用師．自邑告命．貞吝。

城後于隍，隍係乜，隍就係謢城河，謢一個屋村的河就叫做戍，謢一個城的河就叫隍，所以現在重有個城隍廟，一般人都以為城隍廟果個隍係封咗做皇帝個皇，其實唔係，城同隍係兩樣野黎的，城後于隍，道城垟倒塌左落條河度，咁樣都唔知道好定唔好，於是乎就點呢，就勿用師，唔好打仗呀，城垟都倒塌左，都無得打啦，自邑告命由朝廷傳黎的命令，傳乜野命令，梗係緊急的軍事情報啦。貞咎，貞係長期，咎係錯失，所進行緊的事情就好差勒，城垟塌左就唔好打仗，有緊急情報黎，進行事情好艱難，安樂左好耐，樣樣都無保養，無防備，以致到有出乎意料之外的事情發生，又有命令落黎要進行，所以就好辛苦。呢度用一個好无用的守城官來做比喻，一有小小事就攪唔掂，因為平時完全无做預備工夫，唔係以前Ｄ人先至咁樣，現在Ｄ骨肉同胞都係完全唔會去保養任何一樣野，數千年來人的性格根本无改變過。

象曰：城後于隍，其命亂也。

城垟塌咗己經手忙腳亂，再有命令落黎，己經無能力去完成，其命亂就係兼顧唔到。

占到呢一爻問前程：表示就要小心，居安思危，唔好大安主義．

問婚姻：就要小心有突然的阻撓，呢個阻撓係出自平時最相信的人，例如你認為某人係最唔會反對的，偏偏佢就反對。

問事業：就要防備俾人出賣，之後要應付好多麻煩。