|
|
|||
|
|
《易經》．第十二卦 【否】地天否
否．否之匪人 否之匪人，呢個否字，有好多爭論，現在通常都將Ｄ唔好的野就叫做否，Ｄ好的野就叫做泰，點解呢個否俾人當做唔好的野呢，因為匪就係垃圾，就算唔理古代的解釋，就現代的都好多解法，但最正確的解法就係垃圾，渣滓，呢Ｄ就係否，你地Ｄ女性使嬲，最初的時候呢個否字即係婦字，係由商民族一路傳落黎，商民族係一個極度大男人主義的民族，你地睇下朝鮮民族就知，所以商民族捉咗俘虜，有男有女，Ｄ女人就叫做否勒，因為Ｄ女人做唔到野，所以就「劈」鬼左佢就算，捉到Ｄ男人就做到野，因為可以做畜牧的重工作，但係女人就無用勒，所以呢個否就係可棄之物，就謂之否，証明果陣時的女人係垃圾，應該「劈」左佢，呢Ｄ野唔係亂講的，根據馬王堆出土果本易經，呢個否卦當時係婦卦，即係「劈」得的，否之匪人，「劈」錯左野呀，「劈」錯左Ｄ女人，但有另一個解釋，就更傷心，否之匪人解女人唔係人，照商代傳落黎果本易經，就真係寫婦之匪人，女人唔係人黎的，但係到周代的解釋己經和緩好多，就掉轉咗解，你「劈」錯咗野，點解周民族對女性會好好多呢，呢度就要多謝周文王另外一個大太太，同佢生好多仔的大老婆，相傳文王有百子，其實唔係，只係得十個啫。生左十個，十個都係仔，十個都本事的，個大仔就死左，其中有一個最出名就係周公，你地晚晚都去搵的周公，個名叫做周公旦，第二仔就係武王發，由細佬亞旦做軍師，兩兄弟一個郁手，一個用腦，一文一武打嬴左紂王，不過呢Ｄ係後話，呢個亞媽就叻勒，生左個開國皇帝，唔單止咁，由佢推廣呢個紡織業，咁果Ｄ女俘虜就唔使「劈」左佢，叫佢地織布啦，補衫啦，咁Ｄ女人就有番Ｄ地位勒，如果唔係佢推行紡織業，Ｄ女俘虜就難逃被「揼」的命運。 否：否之匪人，不利君子貞，大往小來。 否係否定咁解，否係垃圾，否係閉塞不通，否係不通心情，呢度解Ｄ有用的人俾人當做垃圾，否就己經係低級的，但係都唔係完全無用的，點解呢，因為呢度的否以前係指女人，因為由商朝開始就夏民族的母系社會轉變成父系社會，將女性的地位大大踩低，呢度的否包括左俘虜返黎的女人，將佢地當垃圾，但係佢地係有用的，因為當時己經發明左織布，所以的女人就唔係完全無用，可以俾佢地織布，做衫，當時的紡織業令到女人的地位提高番Ｄ，成句否之匪人解否定錯左，但係呢種情形唔係我地的錯，係社會的錯，係君子的錯，即係訂立呢Ｄ規距的人的錯，呢度應該站在否的立場上睇，即係話俾人當作垃圾，俾人否定左自己的材幹，呢Ｄ係無奈，因為主動權唔係在自己手上，孔子在呢度話「不知命無以為君子」，即係話在呢種情況下一定要忍，點解呢，因為大往小來，大的去，小的來，就係損失，卦象係（）陽爻為大，陰爻為小，陽爻在外走，陰爻內，所以說大的要去小的要來，所以係一種損失，因乾卦代表上升，稱為大往，坤卦代表落下稱為小來，這一卦坤卦在內，代表將小人在位，將君子驅遂出外，因為乾係君子，坤係小人，即係話小人得道，君子失勢，所以不利君子貞，點解，因為大往小來。 彖曰：否之匪人，不利君子貞，大往小來，則是天地不交，而萬物不通也，上下 不交，而天下無邦也，內陰而外陽，內柔而外剛，內小人而外君子，小人道長，君子道消也。 否係閉塞，否之匪人，不利君子貞，大往小來，都係因為否，因為天地不交，而萬物不通，天地不通者，乾卦在上，向外，坤卦在下，向內，變成陰陽不相交，陰陽不相交就萬物不生，亦不通。上下不溝通，點解有用的人會俾人當垃圾呢，因為陰陽無序，地天泰就叫叫陰陽有序，現在係內陰外陽，係小人將的君子趕出外邊，就係小人道長，上面話萬物不通，不通即係腐敗，腐敗的勢力抬頭，就係小人道長，正義進取的勢力就被壓低，就係君子道消，而天下無邦就係己經無晒法紀，無晒秩序，就係無邦，點解，就係因為萬物不通，而致陰陽不交，至到君子道消，呢個消即係退，退即係退縮，退讓，但並唔係代表投降，更加唔係代表變節，因為有上面的種種原因包括左小人當道，惡勢力抬頭，所以就要忍。 象曰：天地不交，否，君子以儉德辟難，不可榮以祿。 天地不交令到惡人當道，否，即係世界變，唔可以正常的常態黎處事，君子以儉德辟難，辟難即係避難，以儉即係隱藏，收埋咁解，天地不交，否，世界立立亂，君子，有大志，有理智，有才幹的人就要忍，即係留得青山在，不可榮以祿，即係無能力去改善唔理想的環境的時候，就唔可以享受高薪厚祿，好似以前房屋署的風波，既然下面班人唔聽你話，你就唔可以留戀果廿幾萬一個月，只有退隱。 問前程：就一定好荊棘，但唔係絕望，而係要等機會。 問婚姻：就會有突然的變故，通常會在覺得最有把握的時候發生，不分男女。 問事業：就有Ｄ唔係你的能力所能夠控制的情況出現。 初六：拔茅茹，以其彙，貞吉亨。 彙：人：拉攏關係 抆茅草，連根拔起，唔好放過佢，彙即係順住一條根連帶周圍有關係的都抆埋，呢度係講小人的勢力越黎大，或者開始壯大，一路去蠶食的好人，或者一路根據Ｄ線索去打擊Ｄ同自己對立的人，貞，呢個貞在呢度解係進行緊事情，貞吉亨就解改變事情的性質叫貞吉，本來係死牛一便頸的，但係現在就好靈活咁樣轉呔，識得轉呔，就亨，就亨通。 象曰：拔茅貞吉．志在君也。 呢個拔茅即係殺到埋身因為以其彙，集合埋一齊黎打擊，點解重貞吉，因為志在君也，因為你預先知道有咁的事發生，所以及早轉呔，呢個轉呔只係暫時閃開，唔係放棄原則，所仍然吉，志在君也，即係搵到個替死鬼，呢個君即係比自己大，或者高級過自己，個背脊厚過自己，Ｄ箭射左去佢個度，就無問題，有Ｄ書解釋為你知道小人的勢力壯大，你就要保謢你的頂爺，因為果班人志在君也，想取其位而代之，所以你就要忠君愛國，保護呢個君，我唔同意，因為以周文王咁奸，咁虛偽，佢點會自己去擋的箭呢，只會去搵Ｄ擋箭牌，因為佢連食咗自己個仔Ｄ肉都可以詐唔知，一個咁深沉的人，點肯去捨己為人呢，但係唔知點解本本書都解為忠君愛國，大仁大義，証明本本書都係互相抄襲，總之天下文章一大抄就無錯，我呢本書係講仁義道德，我係教人忠君愛國架，我呢本係一本好書黎架。 占到呢一爻問前程：就好容易出現突發性的麻煩，而且越來越大。 問婚姻：就仍有一段時間，有排都未得，因為現在先至啱啱開始． 問事業：就會有麻煩，因為內部小人多，但唔好旨意有人幫你，你要自己攪掂。 六二：包承．小人吉．大人否亨。 呢度解庖承即廚中有肉；承：肉 呢個包即係庖承即係成隻牛，成隻羊，呢個庖承即係蒸成隻牛，成隻羊，拎去祭祀，就叫承，後來引申到未曾切開的祭品就叫承，不過當時最細果樣祭品都係羊，斷斷唔會求祈搵隻雞仔就叫承，同時呢個庖承就引伸成個蒸字，蒸字上面蓋住的茅草，中間擺左隻野，下面有火，就係蒸字，點解要用Ｄ茅草蓋住，因為舊時無咁大個煲蓋，所以就搵Ｄ茅草蓋住，而呢Ｄ茅草有來歷的，不過現在唔係講呢Ｄ野，呢度蒸係白蒸，係無落味的，呢個承就係成隻蒸左之後就拎去祭天，所以呢度個包字就叫作庖字，庖即係庖廚，在廚房蒸成隻牛，或者成隻豬，羊，小人吉，大人否，享，呢度的小人並唔係壞人，更加唔係篤背脊果Ｄ所謂小人，呢度的解釋係低級的人，呢Ｄ野係Ｄ低級的人去做就啱勒，因為在廚房的工作係Ｄ小人去做的，Ｄ大人就唔會入廚房的，所以小人吉，小人去做就吉，大人否就亨，Ｄ大人唔去做就好勒，呢度點解Ｄ大人同小人係絕對唔會撈亂的呢，原因就係由母系社會轉變成父系社會之後，開始有階級觀念，而且越來越根深蒂固，其實封建制度就係由周朝開始的，睇下個象詞。 象曰：大人否亨，不亂群也。 大人否亨，呢個否亨係代表放棄咗自己的身份，去做Ｄ低級的野，要一個高級的人去做Ｄ唔係自己份內的事，梗係Ｄ低級的工作，先至叫做否亨，所以就一定係內部有問題勒，不亂群也，亂群就係職責唔分明，大家都唔知做乜，呢Ｄ野又唔知邊個負責，就叫亂群，呢度的大人否亨即係Ｄ高級的人唔去做果Ｄ低級的野，係好的，就唔會亂群，因為職責分明，各司職守，呢個機構就無問題。 占到呢一爻問前程：就表示會有好的現象，會有人幫，你係小人就有大人幫，你係大人就有小人幫． 問婚姻：如果結婚就好，問離婚就唔好，因為結婚就男主外，女主內，職責分明就吉，如果問離婚就有可能父兼母職或母兼父職，即係職責唔分明，即係亂群也，所以離婚呢一爻就唔吉勒。 問事業：如果合作做生意就好，獨資就有問題，因為無人分工合作，所以就不吉。 六三：包羞 呢個包羞應該變成苞羞，羞係乜，羞就係煮餸，羞就係菜，餸菜，爻辭苞羞之後並無俾提示你，無提示吉凶，煮餸，珍羞百味個羞，呢度一樣接番上邊果爻，苞羞就係煮餸，煮野就一樣係小人吉而大人否，呢度又引伸左另一樣野，有餸煮，即係有收獲，唔多唔少都有Ｄ收成，有野食，因為呢度無提示，所以就要承接番上一爻就係話要切合身份先至去做，雖然係有收獲，但係唔大，點解，睇下象詞。 象曰：包羞位不當也。 因為陰居陽位，所以位不當也，雖然有收獲，但係唔多，因為位唔啱，好多書解成包容羞恥之事，呢個係錯解，因為唔知呢個包係苞字，苞即係苞廚，所以同羞恥之事拉唔上關係，只不過係代表有收獲，但係唔係咁多． 占到呢一爻問前程：就表示係好的雖然位不當，但係無表示凶象． 問婚姻：就唔係太好，因為位不當，所以會有陰陽顛倒之象，例如女奪男權，因為位不當，但係呢個位不當係陰爻居陽位，所以女權會高過男權亦唔奇． 問事業：就分工不清，好容易有導致退出之事（因為六三爻變而成遁卦（有退出之象）。 九四：有命無咎，疇離祉。 有命無咎，好簡單，就係接到一個命令，無壞。乜野叫做疇離祉，我的伴侶，我的朋友就叫疇。現在好少用呢個疇，以前用呢個疇同時代表左井田制，因為周民族，實行井田制，周民族未曾統一天下的時候己經實行呢個井田制，商朝，即係呢一個紂王就實行大鑊飯，毛澤東好學唔學，學大鑊飯，其實毛澤東對易經好熟，唔知點解會攪大鑊飯，鄧小平就唔同勒，佢學周朝的井田制，即係由做咗係公家的，變成做咗係自己的，呢個疇就係解成你擁有呢一幅田，佢有側邊個塊田，一塊田貼住一塊田咁就叫疇，其實周民族的經濟好過商民族就全靠井田，呢個井田其實一真沿用到今日，但係去到毛澤東就將土地收歸國有，因為做到的都係歸公家，所以大家都無心機做，做成中國人民在當時係全世界數一數二咁窮，但係鄧小平將呢種情況扭轉。所以一個民族的興衰係同佢的制度大有關係，毛澤東對易經肯定好有研究，但唔明點解會攪人民公社，所以呢個疇離祉就同果陣時的井田制度有關勒，井田就叫疇，離係乜呢，離就係得到，得到就係叫做離，祉就係福，有命，有個命令落黎，無問題，成班耕田的伴侶，成班疇侶一齊得到福澤，就係疇離祉，相傳呢一個就係公佈井田制度的時間，因為有命，而呢個命令就係領佈實行井田制，個個都會係話今次無衰囉，無咎，疇離祉，今次個個都有福啦，咁就可以叫做疇離祉。 象曰：有命無咎．志行也。 無咎，依照命令行事就無問題，點解無問題呢，因為志行也，即係呢個命令得到大多數人的同意，係可行的，呢一爻的意思就係話，呢一個決定係對大家都有益的，所以執行呢個命令就無咎． 占到呢一爻問前程：就一定唔好盲目附從，要分清是非。 問婚姻：就好難自己作主，要聽從上面的意見，所以初時未必咁開心，但係後來就知道好勒，所以問姻緣就先凶後吉． 問事業：就一定要多同人合作，共同做一件事，達到疇離祉的階段。 九五：休否，大人吉，其亡其亡，系於苞桑。 其亡：走咗．系：綁住。 否即係垃圾，休否，即係清除垃圾，但係馬王堆出土的漢帛書就寫成休婦，休婦就係趕個老婆走，休咗個老婆，即係現在的離婚，以前旡離婚的，只有休妻，但係呢度係解揼咗Ｄ垃圾，休否呢的事係由乜野人做的呢，係大人抑或小人呢，泰卦同否卦都係一樣，要適合身份先至得，大人同小人係有分別的，休否就只能由大人去做，下令將Ｄ垃圾清除佢，下呢個命令一定要大人先至可以，所有唔要的野清晒佢，呢個命令就一定要大人，有地位的人，或一家之主先至可以落的，我地去睇風水周時都遇到一種情況，就係間屋垃圾太多，令到成屋人都無運行，但係要清除呢Ｄ廢物垃圾並不容易，因為通常要保留呢Ｄ什物的都係一家之主或最老果一個，所以Ｄ後生的話要清除呢Ｄ野係唔得的，通常會得到一句，你地要掉個Ｄ野不如掉埋我啦，所以休否就一定要大人先至吉，如果唔係Ｄ有權力或德高望重的人去做Ｄ休否就凶，呢兩句的解釋就係要做一樣野一定要符合身份，其亡其亡，系於苞桑，呢兩句同詩經好接近，好有詩意，但內容絕不詩情畫意，內容係話走咗啦，逃走咗啦，你綁在苞桑上面Ｄ野逃走咗啦，苞桑係乜野，係好矮的樹，灌木，唔係喬木，係綁唔實Ｄ野的，其亡其亡，即係話走晒囉走晒囉，你綁在矮樹上面的牛或者羊走甩咗啦，亦有人解釋為綁住Ｄ奴隸走甩咗，亦有解釋話綁住Ｄ女奴隸在Ｄ矮樹度，俾佢地走甩咗，幾種之中以女奴隸就啱Ｄ，因為休否，大人吉。將呢班捉番黎的女俘虜「亞否」休咗佢，唔要佢，即係揼咗Ｄ亞否係要大人至得的，有地位的人先至得的，係大人先至可以落呢個命令，不過其亡其亡，系於苞桑，個大人有度失策，唔應該將Ｄ亞否綁在矮樹上面，綁唔穩俾佢地走晒，所以當時呢個休唔單止係放左佢咁簡單，重包括埋虐待或者甚至殺咗佢，所以佢地呢班亞否一有機會就要逃走。 象曰：大人之吉，位正當也。 大人之吉，點做都無問題，因為佢有權力，點解佢有權力做咁多野都吉呢，就係位正當也，因為剛中正，因為呢個卦係否定，係閉塞，係不通，係有用的人俾人當做垃圾，所以呢度九五雖然係剛中正，但仍然係負面的，唔係一般書上解釋為乜野忠君愛國，君子重返其位。簡直不知所謂． 占到呢一爻問前程：就要小心，容易做犧牲品，一定要走精便，千祈唔好講義氣，有糾紛千祈唔好跟大隊，千祈唔好做亞否． 問婚姻：就成功機會好微，因為唔受重視，所以重未得． 問事業：就唔好同人合作，一定要自己話事，因為錯咗都無問題，自己揹晒佢，同時所計劃的野未必可以實行。 上九：傾否，先否後喜。 否係垃圾，傾否，倒晒Ｄ垃圾，究竟傾乜野否，就係傾個鼎，因為古代用鼎做煮食工具，但係以前的鑄造技術就好差，Ｄ鼎裏面好多隆隆隙隙，就會積埋好多殘渣，反轉個鼎黎清理，將佢清潔乾淨，咁就叫做傾否，先否後喜，起初沖出黎果Ｄ梗係好污糟，不過沖乾淨咗之後就喜勒，呢一爻係講清理的，千祈唔好見到個喜就以為一定好，睇埋個象辭。 象曰：否終則傾，何可長也。 個鼎的渣滓多到唔可以再煮野，就一定要清理，何可長也，即係點可以俾佢繼續積聚的垃圾，黎一個大清洗，大反轉，即係話呢種情形唔可以再繼續，即係革命，點解呢，因上九己經去到極勒，就係否極，但係否極之後只不過係改變啫，未必一定係泰來，所以未曾可以開心． 占到呢一爻問前程：就要檢討以前的處事態度，要改變要重新制訂過晒，或者重新學過第二樣野． 問婚姻：即係話呢一件唔係咁啱你勒，執到都喊一餐．
問事業：先否後喜，問執笠就好，問開張就唔好，問轉行就好，問好唔好繼續經營就一定係唔好，點解唔好呀，因為內部問題太多，何可長也，唔可以再繼續勒。
|
||
乾上坤下