機緣學社 | WISE society

本網頁資料歡迎複制，甚至據為己有，目的只係要推廣五術。

凡投於我門下，必有真才實學；如欲以之謀生，必可佔一席位。

—— 關錦光

關錦光師傅
教授風水掌相命理．專業中國大型廠房風水佈局

招生

只收個別教授學員。

我會被淘汰嗎？

寫這個標題時，本來係（我們會被AI中國豆包淘太嗎）？後來諗下自己有乜資格代表其他人呢，所以用返我會被淘太嗎？講起AI豆包，真係好多人又愛又恨，我唔認識佢，但身邊好多人一有什麼疑問第一時間就扲電話叫佢出嚟，話佢乜都可以解答。

近一兩年有部份客戶有問題，問咗我之後再去問AI，（唔存在咁唔俾面嘅問題，因為個個都係咁做）發覺同我嘅答案唔一樣，問：唔通我叻過AI豆包？我話俾佢聽，我係人，唔係機器，機器係死物，AI豆包，唯一好處就係快，快到係唔相信，喺零點零幾秒之內就俾咗一千幾百字嘅答案出嚟，好厲害，但係咁快唔代表可以取代風水師傅，可以肯定AI豆包唔可以叻過我，因為大家一樣唔可以預測六合彩結果。

喺其他領域AI的確可以取代好多職位，無論學歷有幾高，同AI比都係笑話一場，因為一個博士三十幾年讀過嘅書，AI喺唔使一秒鐘可以就攞晒出嚟，而且可以融會貫通，曾經諗爆頭嘅問題，AI唔使一兩秒鍾就可以俾出答案，所以千祈唔好睇小佢。因為佢係機器，只要係有方程式可以依循嘅野，任何問題都唔可以難倒呢舊野。喺目前喺咁（將來唔知），只有玄學可以令佢產生疑問，因為玄學流派極多，好多大師都有佢獨門嘅操作（秘招），（我曾經最憎呢種人），因為秘下秘下就幾多好野都失傳（中國武術就係其中最明顯的）（仲有就係幾代秘傳嘅中醫），我同中國AI豆包比較過，佢輸咗。

我只係同佢比較命理，風水，面相，我佔優的就係我出題目（因為呢幾樣野我最叻｛我自己認為｝）。命理只係集中喺七煞同食神，傷官同正官呢兩樣野，所表現出嚟嘅唔單止係上司下屬，事業，老公與老婆，小三與正室，仲有情與慾，專一與花心，仲要睇算命師當時所處嘅社會形態（風氣），算命師自己嘅運氣，算命師自己嘅喜惡，因為算命師係人，人有感情，但豆包就唔係，佢接受書本俾佢嘅知識，一就係一，二就係二，食神一定剋制七煞，傷官一定剋正官（所以有官見傷官禍百般之說）。但係豆包唔知道人係俾感情左右嘅動物，食神可以鍾意七煞格嘅人，傷官強勁亦都可以唔剋官星。豆包問用乜野做標準，我答唔話俾係知，你吹咩？佢咳咗我線。

風水對答，我俾咗我自己呢間屋佢睇，俾咗方位同入伙年份，佢唔使一秒鍾即刻俾出答案，中規中矩，唔可以話佢唔啱，但係我無話俾佢知外邊嘅環境，因為環境靚唔靚絕對係唯心感覺，全憑風水師嘅經驗，同一樣嘅景物，十個風水師都可能有十個答案，所以風水絕對唔係鐵柀一塊。

至於面相，我俾咗我自己三十幾年前嘅證件相佢睇，佢用何知歌同面相十二宮嚟睇，佢話印堂有多過一條紋，難過三十一，我話俾佢聽我己經五十幾啦，佢話我鼻頭有肉心無毒，人沖深長子女多，對面微見耳大富之人。

後來同佢講易經，我用無妄卦嚟講，佢唔使一秒鍾就引經據典出咗千幾二千字，完全無得俾我反駁佢。

由此可以推斷豆包係不斷學習，喺交談之中不知不覺套取你嘅資料，而且係舉一反幾十，進步一日千里，但係只要人類唔俾資料佢，相信佢唔可以自己生成（將來唔知），中國豆包係咁樣，但係鬼子佬豆包係點樣真係唔知（美帝紙老虎無可能俾你睇到佢嘅底牌）。

想唔俾呢舊野淘汰，自己就要加幾倍努力。等我叻啲就再同佢鍊過

我有三把劍

封塵之劍：機緣學社學員必有真材實學，如欲以之謀生，必可佔一席位是一眾導師一貫理想，所以在過往多年不斷找尋實習機會給予學員，令他們有機會將所學知識加以運用，但可惜很多同學上課經年，依然未有信心面對陌生人一展所學，令我頗為失望，希望將來慢慢會改善。

出鞘之劍：很多同學都明白學習術數不一定以之謀生，但一定要知道自己所學是否真正有用，所以每遇實習機會，都躍躍欲試，經導師鼓勵之下放膽埋位開口，原來自己所學已經足夠應付有餘，初時戰戰兢兢，一兩次之後就變成享受這種場合。

江湖試劍：很多同學都經過以上兩種過程，之後轉為職業術數師，原因不外乎幾種。其中有部份同學覺得未闖出名堂之前請師傅不要公佈其名字，但亦有部份同學大張旗鼓，無論那一種模式，師傅都衷心祝福他們，不單止可佔一席位，名滿天下可期，並伸延本社精神，以正確術數示人。

關錦光　　丙戌臘月

風水師傅的前景

機緣學社每逢新班招生，例如風水班，八字班，面相班，占卜班，測字班，塔羅牌班，以及進修的易經講座等等，都會接到一些無厘頭電話，所問的都是幾多堂先至畢業，或者係學完六堂可唔可以搵食等等。

對於前者，問要學幾多堂先至畢業？我就會答之以無止境，因為我自己都未畢業，這門學術博大精深，學無止境，如何才算畢業呢，實在我都唔知，對方就會畏難而退，更加唔會報名，招生時期如此對答實在傻更更。

後一種問得重傻更更，學完六堂可唔可以去搵食，早幾年我對這種問題感到好勞氣，世間竟有如此急功近利之人，但都會告知最少都要五六個階段，有實習經驗加上充足的學理知識，到真正相宅之時不會被人難倒，甚或被對方問幾個問題就口窒窒。

但近幾年我對這類詢問電話已經較為心平氣和，告之以學完六堂絕對可以搵食，如此回應並非負氣，更非謊言，而係真心話，因為在六堂的課程裡面，已經教完八宅法，乾坎艮震巽離坤兌等八個方位的相宅方法已清楚講授，如何加強旺氣，如何化解煞氣等亦已經掌握一定操作能力，以之謀生絕非難事。或者驟眼睇覺得好化學，六堂就出去搵食，好唔負責任。但係我們放眼市場，幾多名滿天下的大師級人馬都係用八宅法睇風水，在公眾媒介公開教授亦都係八宅法。我在回答報名的準學生：（佢地得，你都得，只不過你無佢地的背景，無佢地的口才，但係所識既野都係一樣，點解六堂唔可以出去搵食呢。）

基於現今社會形態，不斷轉形，自然會淘汰一班人，而不幸被淘汰的人大部份仍在壯年，（五十左右）要留在老本行，大家都知道無乜可能，一部份較為幸運的有肥雞餐，就可以靠少少錢做點小生意，或作穩健性投資，都可以維持兩餐，但事實上大部份人都無此幸運，手停口停者多，有部份索性擘大口等政府救濟，但香港人大多數都想生活得有尊嚴，尤其是在後輩面前唔使攤大手板，這部份人就會不斷增值自己，重新學習令自己有謀生能力，其中有部份會投於我門下，好勤力地學習，不斷爭取實習機會，而我亦盡能力令投於我門下的學員有真才實學，如果以之謀生，必可佔一席位。我未必係一個最有料的導師，但我絕對係一個胸襟廣闊及有理想的導師，學生以術數謀生，我只有開心，所以我有三把劍送給學生們。

但由名不見經傳至可以站穩腳步，以至略有名氣，這一過程是很痛苦的，因為我的學生都會秉承我的宗旨，唔呃人，唔嚇人，唔裝神弄鬼，純以正確術數服務社群。（唔辛苦有鬼）

其中有部份學生對術數這個行業有疑問：呢個行業咁多人搵食，重有無前景呢？

術數這個行業並無實質物件出售，所出賣的就只有信心二字，如果一個地方在裡面生活的人，每個都對前景充滿信心，知道自己老咗會點，每一件事都有規有矩，人民行事會依正規範，政府行事會依正制度，大家都處於一個公平公正的環境下生活，在這種社會形態下，術數行業的確無存在價值，亦無立足之地，風水師傅只有齊齊轉行，但我們有機會見到言一天嗎？

敬告各位網上朋友

多年前開始設立網頁時，瀏覽者很少，用電郵回覆者更少，網上接到風水工程更絕無僅有，令人懷疑互聯網是否如宣傳般無遠弗屆，但懷疑互聯功能之餘，亦要承認自己並非什麼有名氣大師，少人認識亦屬正常。

近幾年來感覺開始多了瀏覽者，因為用電郵問事漸漸多起來，初時都是一般無厘頭問題，或挑釁性問題，亦有不少是明顯懷有敵意電郵，但都一一以平常心回覆，唯一不回覆者就是所謂行家來電，其中有邀請加入某某會，亦有提議合作販賣風水物品，更有所謂風水大聯盟，真銀齊齊搵等等，不一而足，此等電郵睇過就算，不會上心。

三，四年前開始有人客於網上付款算命，亦有客人網上邀請勘察風水，單從網上業務亦足糊口，但近一兩年出現了非一般情況，就是部份在網上邀請勘察風水之前，都會要求我講出曾經做過乜野大型風水工程，當我回答並無任何大野做過，之後再無回音，陸陸續續都有類似查詢，我都一律三緘其口，為何會有這種查詢？究其根源，是有部份大師在其網頁內大吹大擂，某大機構是由他佈風水局，某大名人家居風水亦由其包辦等等，目的不外自增身價。

但我認為一個職業風水師應有基本守則，就是為客人守秘密，絕對不可洩漏人客身份以提高自己身價，所以在此敬告各位新知舊雨，我並無替什麼猛人或大機構睇過風水，如蒙器重，獲聘為閣下處理風水事宜，不勝榮幸，但切勿詢問此等無聊問題，謝謝。