飛星賦
飛星賦（第一節）（被認為係風水秘笈）
周流八卦，顛倒九疇，察來彰往，索隱探幽。
八卦即係元旦盤，乾、坎、艮、震、巽、離、坤、兌。亦指八個方位，周流者，隨住唔同的時間空間，將八個卦配在唔同的方位，九疇，即係現在用的九宫位，將八個卦根據唔同的時間分佈在唔同的位置，就係唔同的地運的分佈就會產生唔同的吉凶，察來彰往就係用以往的事推斷未來的事，睇到人地睇唔到的野，索隱探幽就係推算D未知的野，其實就係用九宫八卦。
承旺承生，得之足喜，逢衰逢謝，失則堪憂。
玄空飛星講究當運生旺，一間屋飛星係旺山旺向，加上巒頭配合，就係一個生旺的屋，自然丁財兩旺，未必會發逹，肯定的就係比一般人幸運，揾錢舒服D。但係排到飛星係上山下水的話，又或者巒頭掉轉，即係山星見到水，向星見到山，就係衰同謝，未必係損丁破財，最起碼都無其他人咁幸運，最明顯的就係做野有臨門一腳的情形出現。
人為天地之心，吉凶原堪自主，易有災祥之變，趨避本可預謀。
人在天地之間，會受到周圍的環境影響，一般人就話天地間的磁場，會影響人的情緒，但風水師將呢D野叫做氣，分旺氣同衰氣，得旺氣就吉，得衰氣就凶，只要明白八卦配九宫的原理，就會預知吉凶，所以話原堪自主，越係了解得清楚，就越能及早趨吉避凶，預先籌謀，知道吉凶星的方位，就知道點做，例如2021年，流年星六白入中，五黄凶星在東南位，就會在前一年將巽宫位修理好，唔會等到五黄到位先至修補。
小人昧理妄行，禍由己作，君子待時始動，褔自我求。
呢個世界名師多而明師少，小人只不過係無學識的人，禍由己作，古人認為呃人嚇人係有報應的，但係經驗告訴我們，呢個世界係無報應的。殺人放火，同修橋補路的下塲係一樣，君子，有學識的人，做野唔會勉強，亦都明白睇風水有時候唔可以操之過急，地運未到或者流年未到，就點攪都無用，運未到就只有等，時機到就要更加勤力，褔自我求並唔係等運到，而係主動，例如今年的流年八字就話俾我地聽點樣做。
飛星賦（第二節）
試看復壁堪身，壯途躓足。
呢篇文章借用咗好多六十四卦的卦名同卦象來引伸風水的効應，好似呢度的復，係地雷復，即係向星2，山星3，堪身者，即係幅墻倒下，壓到自己，因為坤為墻壁，震為動，墻壁動就自然冧低，向2山3的星組係衰死退氣，外面稍為有風吹草動就自然有野殺到埋身，現今之世點會有幅墻冧落來壓倒。七運午山子向西北位，因向星2山星3，地雷復卦，呢度唔關卦的解釋，只係借用卦的比喻，西北方本身屬金，有破損就有機會有不如意的事殺埋身，土生金，金尅木，多數都係官非。壯就係雷天大壯，向星3，山星6，三碧卦象的身體類象係腳，六白為金，古時就話係馬，人俾馬撞傷腳，但現今之世好少人俾馬撞傷的，代之而起的係俾車撞傷。所以呢度係講有交通意外。
雷天大壯卦向星3，山星6，八運坤山艮向正東位，東方屬木，木强金弱，但係外面的樹有枯乾就代表金有力制木，如果流年八入中之年變成金木交戰，有枯樹就自然易出現交通意外。2021年最大機會，呢度只係取象於手腳之傷，呢D形格就係趨避本可預謀。
同人車馬馳驅，小畜差徭勞碌。
同人就係火天同人卦，即係山星9，向星6，呢度係講山星火壓迫向星金，六白乾金卦象動態，俾火壓迫就不得不勞動，亦未必係辛苦，而係無時停。呢度的動係唔包括利益，所以意思係勞而無功。八運坤山艮向正南位，正南本身屬火，先天性火尅金，山星九紫火旺的流年就對向星六白造成壓迫，例如面向的樓重修，由白色變紅色，住呢個位的人就會馬不停蹄，四處走動。
小畜係風天小畜，向星4山星6，山星尅向星，另一方面又合格，在玄空風水的法則，相尅就有鬥爭，相合就可以化解紛爭，呢度的小畜差徭係向星4受尅，六白代表上司，命令，四綠代表女性，文書，引伸為上司同秘書的關係，或者係女文員，八運戌山辰向西南位，西南屬土，土生金，金旺木弱，辦公室的位置有咁的形格，就好容易有個惡上司，但係唔使驚，因為4同6相合化解凶煞之象，即係雖然要求好荷尅，但態度都不太差，如果流年相沖，就會產生關係變差，例如一白入中之年（2026），七赤年星飛入，就會有D無謂人介入而影響自己同上司的和洽，而致做野勞而無功。
飛星賦（第三節）
乙辛兮家室分離，辰酉兮閨幃不睦。
乙辛係3同7，相合同相尅的組合，3.7合十，相尅係金同木，但有一個條件，就係第三山，重要長男配少女，3.7的宫位好多，如果每個3.7的宫位都會家室分離就太笑話，呢度的分離之象，就一就係金木相合，然後相尅，第二就係大的男人配細的女人，重有就係第三山的宮位，六運辛山乙向東南方，坐西向東，開東南門，如果門前有尖角沖尅，就先天性有潛伏性的婚姻危機，東南係巽宫，巽為木，木旺金弱，4入中之年2023年就有危機。
辰酉係四綠木同七赤金，巽4係長女，酉7係少女，兌巽相尅，兩女相處就會有爭拗，呢度唔係講兩姐妹，而係兩姑嫂（四綠係嫁咗，七赤係未嫁，所以係兩姑嫂），宫位係7.4同宫，向星7，山星4，六運丑山未向，正南宫位，正南離係火的宫位，木火同一陣線，尅住七赤，如果呢個位係大門，而又有呢種身份的人入住，即係個妹同兄嫂一齊住，就容易產生家室糾紛，因為呢種組合先天性不和的，如果流年有火星飛入，五黄入中之年（2022），就會由呢個亞嫂所引起好多紛爭，應該由好少的事而引發出大件事，例如大門口有塊磁磚剝落，就會應有事發生。
寅申觸巳，曾聞虎噬家人。
呢度借用咗命理的寅申巳三刑，首先寅的十二生肖係虎，坤係二克，代表群眾，或者係女人，多數都係指屋企裡面的人，巳係巽，亦都代表女性，成個格局就係2.8的宫位，即係土的宫位，再見木星，八運丑山未向，東北位，東北係土，2.8又係土，連最唔受重視的運星都係2克土，一片土氣，呢個係坐山的位置，山星8見山，本來係人丁與旺的格局，但係如果有破壞土氣的星組出現，就會有意外，例如山泥傾瀉，咁啱又有年星4綠飛到，就有突發的事，最容易出現的就係俾貓抓傷。大D的就係俾車撞傷，因為現在好少可能俾老虎咬傷，代之而起的係市虎撞傷的機會大得多。
壬甲排庚，最異龍摧屋角。或被犬傷，或逢蛇毒。
壬係一白，甲係三碧，庚係七赤，呢度話原本宫位係1同3，山星1白水生向星3碧木，水木相生，有七赤金星飛到，點解會攪到有龍，又推冧間屋呢，原本係卦象上面的玩野，震為龍，一白坎為雲，為雨水，相傳水跟住龍出現，庚為兌，兌為澤，兌震相尅，就有大水之象，例如大雨，山洪突發，但係現在呢D野都唔會出現，代之而起的係有異物入屋，並唔係鬼怪而係陌生人，即係賊，八運辰戌東北宫位，外面有高速的水流動，即係高速公路，大部份的高速公路都可以列為煞氣，如果有七赤飛到，7.1金生水，水生三碧木，而外面高速流動的水變為煞氣，所以三碧亦變成賊星，所以就有賊入屋。4入中之年（2023）就要小心門戶。跟住話被犬傷或逢蛇毒，都好少事，點及得有賊入屋咁大件事呢。
青樓染疾，只因七弼同黄。
七係七赤金，弼係右弼，九紫火，黄係五黄，呢度所取的象理全部都係負面的野，先決條件就係外面的景物無一可取，例如開山，或者一大片回收傷，間中就發生火警，呢種的形格，就算幾叻的大師都覺得無能為力，只有等外面呢D野搬走，或者建有新屋阻擋開山的位置，風水師所做的野先至會應驗。呢度所取象的7赤係妓女，九紫火為離，離係美麗，即係7同9係一個好靚的妓女，五黄係代表有毒，成個宫位係山星7，向星9，面向回收傷或開山的山壁，甚至乎係火燒過的山，再有五黄飛到，就切忌上青樓，因為原本9.7的宫位，一早就已經知道，亦知道幾時有五黄凶星飛到，更加可以知道月星五黄幾時飛到，有咁多資料，就吉凶本可預謀，如果咁樣都重要鐘埋去，就真係抵死。七運辰山戌向，東南位，2021年九月最有機會中獎。
飛星賦（第四節）
寒戶遭瘟，緣自三廉夾綠。
寒戶係伶仃屋，例如周圍的屋好低，自己獨高，或者周圍都好高，夾住自己間屋好低，或者周圍都係新屋，自己一間係舊屋，而且係破落的，即係甩甩漏漏，遭瘟即係有病，點解呢，因為第一係寒戶，第二係三廉夾綠，三廉同夾綠，三係三碧，廉係廉貞即係五黄，綠係四，成個組合係向星3，山星5，再有4綠飛入，成3.4.5的組合，卦象所取的係正面或者負面就要睇外面的環境，呢度的向星3，山星5宫位，望到的一定係枯木一片，最有機會的係一片蕉林，當蕉農斬咗蕉之後，必定將蕉樹欄腰斬斷，呢段時間係呢一片蕉林最核突的時間，如果呢間屋面向呢種環境，咁啱又有四綠木飛到，就有機會染到特別的病，呢度有機會唔止一間屋，而係成條村都有可能患傳染病。七運辰戌，東北位，向星3，山星5，自己係伶仃屋，外面有一兩棵枯木，或新近火燒山，而有4綠飛入，1白入中，2026年七月最大機會，有特別的病，除非唔病，病親就唔係人咁品，所以首先外面的環境係最重要，如果外面的景物平常，就算有凶星都唔係咁大件事。
赤紫兮，致災有數，黑黄兮釀疾堪傷。
呢度係牽涉到先天數同後天數，後天數即係河洛五行，在羅盤的第二層就好清楚，即係一般常用的五行，而先天數亦都係在第二層睇到，1.6係水，2.7係火，3.8係木，4.9係金，5.10係土，呢度的赤紫係包括咗先天7火，後天9火，即係7.9同宫，主犯火災，紫白訣有講︰(七九合轍，常遭回祿之災)，山星7，向星9，因為先天係引致，後天係發生，所以向星係九紫，7.9同宫表示有機會發生火災，而要有火災出現，2克5黄出現就有可能火燒之事，另一個可能就係3碧4綠出現都大機會。八運甲庚，東南位，呢個位好大機會係睡房，有3碧到東南位，2023年就要小心。
黑黄兮釀疾堪傷，即係2.5同宫，代表容易有病，呢種唔係普通的病，山星2，向星5，玄空飛星講究當令同失令，2同5在八運唔使講都係失運，啱啱八運樓最多2.5同宫的屋，所以在八運最好的行業就係醫藥同殯儀業，凡2.5同宫係睡房，都要小心健康，房內佈置要少用紅色。最好用鐡床，床底要保持乾淨，床中間的天花唔好有燈，就可以減低凶象，遇到三碧木星或九紫火星入房，就要特別小心，只要平時飲食小心，就唔使擔心。但係房外面有廟宇，或教堂的尖頂，就要用物件化解，例如用金屬的機械鐘，或者用銅盆栽水植物都可化解。
飛星賦（第五節）
交至乾坤，吝心不足。
乾坤即係6白同2克，交至即係6白見2克或2克見6白，跟住話吝心不足，就一定係山星的事，乾坤各有所主，呢度話吝心即係孤寒，所以一定同錢有關，既然講錢，乾就代表貴重物品，金錢或者珠寶之類，坤就代表多或少，因為土係生金的，孤寒係性格，就係2克的事，如果2克土受到制肘，就生金無力，性格就變成吝嗇，貪錢，而咁多組星之中2克土星係最容易受尅泄的，所以呢度唔講五黄，8白而專講2克，就係咁的原因，凡6白所到的位置有2克土星飛到就叫做交，如果外面的景物無沖又無尅，表示性格開朗，疏爽，但如果有反弓水，山石巖巉，就自然變得吝嗇小器，掉番轉頭山星2克，有6白飛入，就表示會有横財，如果外面有尅制6白的野就主破財，都係可以預知的。
同來震巽，昧事無常。
震巽即係3.4同宫，昧事無常即係做野不分輕重，遇事猶豫不訣，或者因循苟且，在六.七運裡面都無3.4同宫，只有在流年星飛入先至會出現，3.4即係陰陽木，通常見到4綠木主聰明，亦代表文昌，再見3碧加强木的力，應該係更加聰明先啱，但係跟住又話昧事無常，故名思義，外面的環境一定好差，最差的莫過於反弓水，第二係尖角沖射。八運酉山卯向西南位，呢度通常都係睡房的位置，如果見圓形的山，有適當的樹木，就代表人聰明，處事爽快，如果見泥唔見樹，或者有反弓水，就自然做野進退失據，遇事猶豫。
戌未僧尼，自我有緣何益。
古人寫野飄吓飄吓，啱啱先至講緊用八卦代表九宫的星組，即刻就來一句用廿四山來代表九宫的星組，戌未係6白同2克，戌係乾宫，未係坤宫，有緣係指乾坤相生，自然係富貴的組合，如果環境唔配合，就變成(交至乾坤，吝心不足)。呢度的為憎為尼，唔係真係做尼姑，和尚，而係話呢度的人會迷信，跟唔上呢個世界的步伐，性格亦都保守。七運酉山卯向，東北位，山星6，向星2，如果係大門，就需要有一定的條件，就係要有明堂位，外面無廣闊的明堂，裡面都要有番十尺八尺先至似樣，重有最重要的就係要够光猛，如果大門陰暗，2.6宫位的大門就一定迷信思想落後。唯一的好處就係有誠心的宗教信仰。
乾坤神鬼，與他相尅非祥。
呢度仍然接住上面一句，都係山星6，向星2的組合，所謂鬼神者，唔係宗教的神鬼，而係卦象上的表示，乾為天為神，坤為地為鬼，相尅係指外面的環境，非常惡劣，就會令人覺得鬼跟尾，令人覺得有幻覺，做就咗一部份拜神的風水師，可以搵好多錢，其實八卦所顯示的表象，並無涉及陰邪鬼怪之事，而呢度話神鬼相尅，只不過係話外邊的環境太差，就乜野星組都係多餘的。
飛星賦（第六節）
當知四蕩一淫，淫蕩者扶之歸正。
1.4為文昌組合，甚麼木入坎宫，貪狼星入巽宫，坎元生氣入巽木等等，都係講1同4的好處﹐俾人覺得1.4同宫無樣差的，而呢度竟講到咁衰。因為凡卦象都有正面同負面的表示，坎為水，水性飄浮而虛蕩，水勢過大，必然無制，巽為風，風亦為飄蕩不定，巽為女性，坎為男子，水過大令木勢無根，亦都係女性俾男性影響咗，用詞就係迷失自我，因為五術書籍係男人寫的，所以呢度的四蕩係話女性不守婦道，係被動，即係有人引誘，一淫係話主動去勾引男人。任何宫位水勢過大都係差D，而1.4同宫都唔例外，水過大會令到人無主意，而要真係有文昌的得用就要有先訣條件，就係還宫復位，即係四綠去返巽位，就係最有効的文昌位，例如六運坤艮，七運子午，八運艮坤，有呢D宫位重要有水同木，先至應得到正面野。如果水過多，就隨便，如果木過多就刻板，兩樣都唔係真正好，有D宫位只得一樣野，例如只有一白水星或只有四綠木星，就要後天加以補足，亦不失為一個有用的文昌位。
須知七剛三毅，剛毅者制則生殃。
七就係七赤，三就係三碧，七赤係破軍星，有肅殺劍鋒之象，三碧另一個名叫蚩尤，即係黄帝的對手（古人寫書實在得意），三碧所到之處，都會產生鬥爭。3.7的組合亦都係一個剛陽的格局，如果外面的景物唔配合，例如有火形尖角，三义去水口，就做成穿心殺的効應，由於金木相尅的關係，所以大部分3.7的宫位，有問題都會出在長男身上，呢度話須識七剛三毅，剛同毅即係好强硬，有呢個星組配合外面環境所做成的殺氣係好勁的，唔容易化解，跟住話制則生殃，即係只可以化殺，唔可以制殺，六、七運的東西向每個山向都有3.7的宫位，七運酉山卯向，正西位，山星7，向星3，先天性係金的位置，自然對三碧做成尅制，加上山星尅向星，呢度三碧就雙重受尅，運星9紫，又泄三碧的氣，背後眼平線對正有人裝修，有竹棚尖角沖射，铝窗已拆卸，但未裝新窗，做成一個破洞，流年星5入中，七赤到西位，五月七入中，九紫到西位，咁多樣都對三碧不利，尤其是係做流動性工作，在呢段時間容易有意外，最容易出現的就係腳傷，有機會俾車撞到而傷腳，但係傷到乜野程度就好難判斷。基於吉凶本可預謀的原則，化解之法只可用泄金之氣而唔可以用鬥殺之法，可用動水泄金生木之法，例如擺一個魚缸，放魚三條，加少量水草，可泄金及動土之殺氣。
碧綠風魔，他處廉貞莫見。
又係三碧同四綠的宫位，上面講過三廉夾綠，同來震巽等等，呢度話碧綠風魔，就明顯係精神的問題，3.4同宫在六七運係唔會有的，只在八運的東西，南北向先至有，所以在八運的屋多數都係原宫位有3或4，跟住在流年星再有3或4相應（飛入），就會產生吉凶的効應，最大的問題都係見到五黄，但呢度的重點係他處，呢個他處並唔係求其一處，而係3或4的本位，先決條件就係三碧或者四綠的宫位有殺氣，但係未必會爆發出來，例如外面有尅煞，但係宫位有相合，就係相尅而又有相合，但在本位有五黄到，就會引發情緒病，嚴重者會有精神病，要睇外面環境衰到乜野程度。八運乾山巽向，東北位，4.6同宫，原本格局係旺山旺向，但呢個宫巽木被乾金所尅，外面又係金的形格，2021年6白入中，五黄到巽宫，就會影響到東北位的四綠，即係長女在外面做野會好受氣。