癸卯年說

癸卯年有新嘅希望，主觀願望當然係向好的一方面想，風水從業員係無特別嘢賣嘅，所賣者就係信心，正面訊息同埋希望，世界不斷在變，所以每個人都要因應環境調節自己嘅心態，切忌死牛一邊頸，否則好容易被淘汰而不自知（好多人衰而不自覺），要知道變成點，就要了解流年大勢，用一句名言就可以概括今年嘅勢態，就係（讓一部份人富起來），即係大部分人不會富起來，引伸為一般人都無乜好日子過，因為流年格局係水弱，強木生火，土星隱藏金極弱，演繹出嚟就係鍾意吹水，未做已經大吹大擂，驚死無人知，但係埋單計數（年尾賽後檢討），原來乜都無做成功，點解有呢種結果呢？因為樣樣都揸唔到主意，每一件事的結果都出乎自己意料之外（自己弱就自然被動）。

今年嘅動象好大，無論大至政府，小至賣咸脆花生都好似好忙碌，實際上係見身郁唔見米白。對男性來講，係一個勁旺既桃花年，亦都係搵錢年份（係搵錢，唔係剩錢），因為今年桃花旺財亦旺，但係桃花與財只可以任擇其一，兩者兼得的人百中無一，所以專注於財的人桃花自然弱，專注於桃花的人財肯定弱（唔使算命都知），無論鍾意那一樣，只要開心就得。

而女性方面，今年有旺火生土，所以以前嫁未出嘅女性今年都有機會上花轎，同時有一個好好既藉口，雙春兼閏月，有得嫁就好快嫁喇。

今年亦有一個特點，每一個人命中所無嘅都可以喺今年裡面碰到（唔係每個人都可以掌握得到，視個人嘅能力而定），純木，純火，純土，純金嘅月份都有，各取所需。呢種格局要12年之後先至會再出現，到時己經係戊申年，大前題已經唔同曬啦。

風水方面，本地近十年來都係缺點多於優點，但係有一個優點就係司法獨立，當這個地方司法不能獨立存在的時候，己經再無留低既價值。

本年的大趨勢係讓一部分人富起來，原因係衰星進駐乾宮，會有濫權情況出現，由小生意至大生意（管理香港都係一盤生意），都有利用職權做少少對自己有益嘅事。另一方面就係權力越高嘅人越容易有意外出現（包括意料之外嘅病，乜嘢病自然係因人而異），凡事都有正反兩面。

另一個就係病星進入震宮，長子痴迷，唔係講笑，會做埋啲令人唔認同嘅事，最主要係長輩唔認同，可以預見宅男越來越多。

一般人所認識嘅財星進駐離宮，火炎土燥，大家財運都唔慌好得去邊，最快都要去到農曆七月先至有轉機，因為前面六個月都係木火土嘅五行，只有令到財星無生氣，所以大部分人都有求財困難嘅情況出現（本年嘅財星係眾人嘅財）。

一白吉星進入坤宮，同命格流年一樣，有得嫁就要快啲，請勿猶疑，同埋唔好擺款，甩咗就恨錯難返呀。 七赤衰星進駐艮宮，就會出現好多三隻手事件，真係攪唔明白，本地已經係一個天下無賊嘅社會，點解仲會有三隻手嘅男仔出現呢？正是無人知道天機（過後就知）（馬後炮個個都識放）。

六白吉星去到兌宮，六七同宮多爭拗，爭相出風頭，自然多是非，無乜大問題嘅，因為只係口角之爭，但會好嘈吵（聲音屬金，陰陽金相格，自然好多噪音）。

三碧木星入巽宮，又係爭拗嘅源頭，今年無可避免大有大爭，小有小吵，因為出現震巽同宮，乾兌同宮，天機真唔係咁容易明白，本地已經無曬反對聲音啦，仲有乜嘢好爭啫，但係風水預示話畀我哋知，金木相對必分勝負，一般人最好保住睇戲嘅心情，切勿參與，否則死咗都唔知乜事（風水無講大話嘅，問題係我哋對風水認識有幾多啫）。

文昌星困處中宮，從正面嘅方向睇，今年狀元一定比往年多，值得開心。從負面方面睇，狀元嘅出路好小，向東走遇鬥牛煞，向西走見交劍煞，東西方都不利年青人，向北方走見水火未濟，好難適應，亦都唔係咁受歡迎。向南走見八逢九紫，最利年青男女，值得考慮。

本年由命理或風水判斷，都有正面或負面現象，可憑個人環境能力作出取捨，適合Ａ君未必啱Ｂ君，吉凶都因人而異。