辛丑流年

辛丑年的立春時辰，有好多版本，有壬午日亥時中，壬午日亥時尾，又有癸未日子時頭，我最先寫咗壬午日亥時尾呢個版本（22點58分），之後睇咗幾次，覺得唔似，再在寫一個癸未日子時（壬午日23點01分），現在的版本係癸未日子時頭的，到時睇下邊個版本較為接近（唔會絕對啱）。

呢一組八字陰年，排月份或者大運都係順行（有原因的），成組格局都幾低吓，基於係日主弱又係傷官格，天干無傷官透出，天干有嘅有歸庫，有己土露出而戊土隱藏，庚辛金不足以化解己土之力，如果呢一組八字係某一個人的命格，就註定俾人蝦而無力還手，壓力大，但係好難化解。

將這一組格局代入幾樣角色，由這幾個角色就可以知道，辛丑年最得益嘅係哪種人，我自己係一般平凡人，所以就以由一般人開始，在這個格局裏面這一群人係最多的，有比肩，有劫財，但能力係最低的，綜觀整個格局，這一類人有一定的能力，但冇機會發揮，表面上好似好多人幫，但全部都係虛浮無根，屬於到喉唔到肺，僅僅有承受壓力嘅能力，開源無能力，因為壓力大，節流亦都無能力，只有造成怨氣一大堆，究其原因就係因為資源唔夠分配。

另一班人屬於一般人之中的知識分子（中產），這一班人盡社會責任係最多的（其實係佢地走唔甩，無可奈何），但得到的照顧係最少，亦都係揸唔到主意，亦不能掌握事態發進展，更不能預知前景，上不到天，下不到地，又唔係最窮，又唔係最有錢，屬於最差的一群。

再上一層就係商人，因為成個格局的財星無透出，所以對做生意嘅人非常不利，這一年生意人官煞蓋頭，隨時有意想不到的壓力，財星不向自己，引伸為多勞小成，借用某君名言（今年唔死就算成功），以生意人嚟講，辛丑年肯定衰過庚子年，唔使用五行分析都知，唔單只係本地，放諸四海而皆準（中國例外）。

再上一層就係權力分子，有能力欺壓一大群人的人，自然係掌權份子，呢班人最得益，因為財星旺，只要拎出小小虛浮無根的所為計劃，一幅圖畫，就自然可以接收一大堆財富，起碼在這一年裏是這樣的。權力越大所講既野就愈係虛浮無根，所有決定不切實際（不單止本地如此，舉世皆然），而有權力的一群亦都互相鬥爭，最主要就係爭奪財星，這一年肯定出現好多不要面子，只銀子的面孔出現，可能自古已然，於今猶烈而已。

庚子年立春八字只寫到五月，就諗嚟諗去都寫唔出，寫咗幾次都覺得唔似，所以放棄咗唔寫，係十幾廿年來第一次，只有自己安慰自己，唔好當自己係神仙，自己只不過係一個風水從業員而已，推算唔到庚子年嘅玄機，絕對唔使唔安樂，亦唔使覺得無面，總好過講啲阿媽係女人嘅嘢，例如有大交通事故，大火災 大水災，大瘟疫等等，不如等到真相大白之後再重新印證，吸取教訓重實際得多（無可否認係水皮啲）。

辛丑八字，木土相戰，引伸為本地與外力互片（鬥爭），缺少了通關五行，所以無所謂人緣，和洽，忍讓，稍不如意即惡言相向，引伸成今年睇風水的首要佈局就係令人和洽肯忍讓。

辛丑年一般人的身體狀況都係好的，由於五行不平衡，就偏向於多腸病，連帶膀胱排泄系統都有問題，因為五行火極弱，所以心肺病一定多，至於疫情會一路延續，其實係東西方嘅生活習慣問題，亦都係政治問題，並非係一個風水從業員所能夠判斷（邊有咁叻呢），做好自己能力範圍裏面嘅事就己經好叻，（呢篇文字如果睇唔明，可以要求索取學理版）。