寫在九運之前

寫在九運之前（一）

三元九運之中，七八九運屬於下元，由2024年開始往後20年，就係下元九運，要推算香港運氣，大方向就好簡單，但細節就比較複雜一點。香港係以水為財，金為生水五行，所以由六運開始，香港就一路向上騰升，同時亦有另一件事幫助香港一臂之力，就係喺六運之初由北方過來一大班人，呢班人最初絕大部分係貧無立錐之地（記得有個大隻佬拍我家門，問有無飯食俾佢食？當時屋企人煮咗一煲飯，蒸咗一嚿鹹魚，呢個人就用一嚿鹹魚餸四碗白飯）（可能這個人今時今日已經成為城中富豪）。當時香港係靠呢班接近一百萬人，佢哋勤勞肯搏（一日做十六個鐘頭係最基本），佢地投身於啤膠花，上鏈玩具，手錶，製衣等等行業，加上之前上海嚟咗一班工業家（例如唐先生的祖輩），一邊出錢，一邊出力，兩個組合造就了香港工業起飛。

亦都同時有風水上的自然配合，六運之前香港機場無乜飛機升降，但六運前期機場開始擴大，最主要原因就係飛機場座落的位置，係香港最大的聚水區，因為香港係以水為財，而飛機起飛降落時產生大量動象，從而帶動香港經濟一直由六運運轉上七運，六運同七運都係金五行，自然會生旺水五行，所以呢兩個地運就將香港推上經濟高端。

而其中亦有不少波濤起落，但每一次跌低再起，都比以前升得更高，這是多得聚水區飛機升降頻繁，人流非常頻密，動象非其他地方可以比擬，從以往的經驗就可以借鑒。

九龍灣呢個地方係香港最大的聚水區，如果消失了動象，經濟自然向下滑，好不幸就真係有這樣的一天，九七回歸後機場搬走咗，同一時間呢個地方的動象完全消失，幾千公尺長嘅前跑道竟然凋荒左將近廿年，而香港的經濟亦都同預料一樣，十幾年都無起色（所謂無起色者係同自身以前比較），就算升幅好微，但與其他地方比較升幅仍然係可觀，尤其是進入八運，地價及樓價的升幅比其他地方高得多（中國的名言，有土斯有財）。

地運進入下元八運，仍然係以水為財，水必須要有動象才能產作用（財主動的原因），香港係一個開放型城市，所以人來人往就對經濟有增長，Ａ區去B區等等，就會產生繁榮社會作用（我每日都盡力去做），其他地方的人飛來香港或本地人飛去其他地方，順理成章就產生世界經濟互動，而產生這種互動都係要靠飛機，所以飛機升降的密度，就決定了這個地方的經濟狀況。

香港係以入水口為向，而好幸運的新機場正在入水口位置，令香港經濟一路向上增長（可惜不是聚水區）。香港飛機升降的密度曾經係世界數一數二的，但不知何解竟然將機場封鎖，斷絕了香港的經濟來源，在可見的將來都好難再重現機場的繁榮景象，亦即係香港經濟不復繁榮，就算再出動有形之手，相信都無濟於事。

寫在九運之前（二）

眾所周知，香港係以水為財，由六運前半段開始，經濟一直向上騰升，都四十年有多，當中造就了不少世界級富豪，由滿山木屋變成石屎森林，就可以知道香港人幾咁勤力，但理智話俾我哋知，經濟無可能永遠向上的，必有掉頭回落的一天。

要經濟回落向下，必定係由一件無關痛癢嘅事出現而引發，例如有個女子在外地被謀殺，就令香港出現咗一連串事件，一路發展到不可收拾的地步，亦都係地運的八運尾向九運，火炎土燥，無咗金水的靈活性，以至各不相讓，如果係七運絕對不會出現這個狀況。（在中國歷史上，女人的地位最係卑微的，但偏偏改變世界的就係女人）。

記憶之中，六運及七運都係香港經濟騰升的日子，其中有部分時段經濟稍為停頓，例如八九年事件發生在外地，但直接影響香港，其中造就了不少香港廠家遷移北上，成就了無數北方富豪（講都無人相信，少少一個香港竟然引發一個龐然大物的工業革命），幾十年後再無人承認呢個事實，其中胡先生功不可沒，但今日亦不被承認。

呢個就係風水格局上面嘅迴龍顧祖大局，可惜因為機場遷移而破壞咗呢個格局，變成咗勞而無功，不單止如此，過咗幾年之後就更加成為中國的負累。原因係轉上八運，五行屬艮土，高山燥土，對一個以水為財嘅地方，由金生水變成燥土制水，水五行不單止係財星，更加係靈活之星，越深入八運，本地的人就越缺乏活力。

艮土代表少男，所應者一定係男仔，或者未結婚嘅男仔（現今的少男少女多數都唔結婚，養狗仔唔生仔）。八運愈向前，就越接近九運，越趨向火炎土燥，缺乏水嘅靈活性，愈偏向萌塞，有權與無權者都各走極端，實屬不幸。

近十年來舊機場跑道大興土木，丟空成廿年的寂靜地帶變成動象處處，一片欣欣向榮之象，加上建造一個國際級的郵輪碼頭，可以增強聚水區的動象，聽到呢個消息即時都開心咗一陣，但不知何解建築設計竟然係一條直線，完全無高低起伏，有某大師話係龍出大海，可以帶動香港經濟起飛咁話，但有某君好唔識撈，將之設定性為死龍，仲兼有一口大釘插在龍頭，自然全無生氣，實際環境真係完全無活力（叫得做一條龍，必定係蜿蜒曲折，高低起伏先至係活龍），估唔到呢個郵輪碼頭竟然將聚水區變返完全無生氣嘅還原基本步，真不幸。

寫在九運之前（三）

術數師最鍾意做嘅事就係推算地運，因為在六運推算七運，由七運推算八運都係十幾二十年嘅事，回想由六運推算七運就好簡單，七運係兌卦，主少女，主口舌，西方，所以最簡單嘅就話女人叻曬，能言善道的人就會發達，因為七赤係破軍星，所以好肯定動到處動土（破而後立），所以喺呢二十年裏面差唔多大半個香港都番新過嚟，因為七赤主口舌，自然多官司。同一時間產生好多風水大師，但轉上八運就完全唔同曬，八白土係講究真材實學，所以好多七運露出頭角既風水大師都自動消失咗。

但推算八運有一樣嘢係完全錯的，八白艮土，主少男，在七運尾推算八運，以為少男（後生仔）一定好叻，主導呢個地方嘅財富（八運的地標喺飛鵝山，高大挺拔），然有一番作為，但事實與預測背道而馳，反而俾班後生仔攪到雞毛鴨血，所以從來無人知道天機。（如果有人話：我唔可以再講咁多㗎喇，洩露太多天機我唔掂架，你就可以即刻媽叉佢，你係老幾呀，有資格知道天機咩？）風水只論結果，唔評論對與錯，亦都唔理因乜嘢原因，所以衙門拜關公，賊佬亦拜關公。

本地係開放型經濟城市，以水為財，水主動，所以本地一定要維持某一程度嘅動態才可以維持生機，究竟乜嘢程度嘅動象才可回復生機，就真係唔知，但由以往經驗可以借鏡，曾經嘅機場位置有大量飛機升降，帶動聚水區嘅氣流，而產生大動象，經濟亦隨之興旺。

但事移勢易，本地優勢一去不復返，最簡單嘅就連酒店嘅世界計時器（顯示各地嘅時差），都慢慢俾上海取代咗本地位置，要回復昔日嘅光輝實在無乜可能，眾口一詞話星加坡已經趕過咗頭啦，其實星加坡何德何能騎在本地頭上呢，睇地理環境根本同本地無得揮，講人才更加輸九條街，佢所恃嘅優勢，只不過係有自主權啫。

週邊嘅地方咁進步，都係由本地嘅人才流過去開始嘅，假以時日本地嘅機場回復番每兩分鐘升降一架嘅時候，本地經濟亦可重新傲視天下，但呢一日係幾時呢，有無人知道天機呀?

近來關於幾時通關預測，都有好多阿媽係女人嘅推算，事後再睇番真係得啖笑。

而我亦希望用玄空加上四柱八字（時間加空間）推算以求一矢中的。

寫在九運之前（四）

在七運時，後生仔女嘅轉數好快，腦根好靈活，（七赤為少女，後生嘅人，七運土薄金厚生水，樣樣都手快脚快，所以腦筋靈活的人樣樣快人一步，乜都有得炒，做就咗好多有錢人）。

由七運轉上八運，變成金薄土厚制水，五行水被制，開始揾錢唔係咁容易，腦筋漸漸偏向萌塞（死牛一邊頸），大環境亦不斷填海，包括咗將來水口收窄，同時將曲水有情慢慢變成直水無情（環境肯定改變性格），出現咗一件好小嘅事，引伸成各不相讓，（作為一個風水從業員，只能夠眼光光睇住環境一路急轉直下，向住自己預測嘅方向發展，而完全無改變能力），在這種沙塵滾滾環境下僅可自保。

近年唯一做得啱嘅事，就係吐露港填海，但係又俾另一班所謂有識之士嘅人諸多阻攔，想做一個小小嘅游水地方都攪成十年有多，原因唔係我地一般小巿民所能明白嘅。

短期內會由八運轉上九運，喺大方向睇就一定係好的，例如國運一定擠身世界頂尖，將美帝紙老虎掉在身後，但係國家大事幾時輪到我嚟俾意見呀，我嘅能力只係令到相信我嘅人生活過得比其他人好，保持身體健康，就已經盡咗作為風水從業員嘅能力。

大部份人都知道，風水係唔可以令人發達嘅，但係有少部份傻人睇完風水之後坐喺度等發達（多數都係聽信了某類大師所言），風水的能力係令到人有健康的體魄，良好的人緣，足夠的奮鬥心，發達係要靠自己（其實點樣係發達我都唔知，因為風水師自己都未發達）。

九運五行屬火（丙丁巳午）；方位屬正南（丙午丁）；人倫屬中女（上有兄姊，下有弟妹才為中女），但亦通指女性；性格急躁而心軟（容易信人）；身體為眼睛，心臟（多數人容易患上的病）；本地九運的地標為太平山（唯一被公認的地標）。依照山形判斷，在九運裡大多數人的環境應該不俗（山形豐厚），社會狀態和諧平穩（印象之中未見過火燒山），山形圓厚為富山，所以在九運裡，只要乖乖地耷低頭搵錢，超出自己能力既事唔好理，就會好快樂。

本地位處正南，以土為本，以水為財。火旺生土，火旺制水（印強身弱財受制），奉勸各位切勿以夜郎自居，如果仍然以為無咗呢個窗口係唔得嘅，就唔單止自己無好結果，仲會累埋身邊嘅人（風水從業員唔應該有立場，只係以勢論事）。

寫在九運之前（五）

現今之世無人曾經經歷過九運，關於上一個九運的社會狀況，都係睇歷史記載的，時序大概係鴉片戰爭與甲午戰爭左右，滿清政府同西方列強相比，可以用民智未開來形容（狄娜拍過大國崛起紀錄片，裡面有一場戰役，戰果係三萬比七），當時的國運真係差到無可再差，但時移世易，當時的所謂西方列強，今日都被踩在腳下，大部份都爭相登門造訪，令我們充分體會風水輪流轉係真的。

現在要在八運尾推算九運，由於九運的內容係九紫離卦，五行屬火，方位係正南，氣候自然係夏天，卦形係陽陰陽，屬陰卦，引伸為陰屬女性，由於陰爻在中，所以類象係中女，進一步類象離為目。由於火無定形，引伸為飄忽不定，不定者係不穩定，呢度係講人既心（丁火為心），或者可以引伸為人心思變（九運有二十年，究竟係相應在那一年，就要慢慢度出來），人心係最難測度，好似火一樣，飄忽不定。

推算國運，自問未夠資格（區區一個風水從業員，走去評論國運？），但推算自己生活的地方（一針之地）並非難事，首先要符合九運的法則，先決條件係南方見山，北方見水，本地已經唔合格，如果只係計算呢隻大青蛙（港島）就合晒標準，但實際係要計埋九龍新界等地方，就完全唔合格，先決條件已經遠離標準，另外本地山多平地少，而九運以火為主，形格係強火生旺土（火炎土燥），本地要求係金生水，以水為財，火土強自然剋制金水，所以財運並不樂觀，尤其是少年男性，火多土焦（八白土為少男），肯定搵錢艱難。

另外，火強土旺制水，木自然無生氣，五行以水木為文昌，本地文化好肯定愈來愈差，木主仁，木無生氣，自然愈來愈無慈悲心，漸漸會與其他地方睇齊。（續）

寫在九運之前（五B）

九運最簡單嘅要求己經做唔到，時值八運尾，九紫火進氣，火炎土燥係最基本的格局，引伸出一樣最差嘅現象就係鍾意保持現狀，可以保持現狀就係好嘅，但係世界其他地方不斷在變，而自己不變，有個好好嘅名詞，叫做立定宗旨，不為所動。另外有個更好嘅名，就係衰而不自覺。

評論國運真係唔識，但講中華大地風水絕對唔難，大地既河流係由西北向東南流，即係西北地勢高，東南低，九運臨近，強火生土埋金制水，人的性格受地運所影響，無咗金生水既靈動性，行為就開始改變，首先被改變嘅就係少年男女，以男性為主（離火強，艮土焦）做事自然極端，尤其是係錯咗唔肯改。

艮土無生氣，消失咗生金嘅歡欣狀況，進退失據，皆因臨近九紫火運（地運每20年一轉，但不是絕對啱啱20年嘅2月4號就轉運，如果揸住咁嘅標準就真係笑死人冇命賠），同時產生另一樣負面現象就係代溝越來越嚴重（火勢向上，永無回顧），再無七運嘅金水互生的一片欣欣向榮嘅景象，可以預見九運嘅20年的確係負面多，正面少，幫客戶算命嘅口頭禪（想改變命運好容易，改變性格就得啦），但係江山易改，性格有咁容易改咩。

尤其在九運裡面，人在地運中，大部份人不自覺受地運所左右（行衰運而不自覺），喺九運中要企在小數行運嘅一邊絕不困難，首先由性格開始（我推薦大家睇幾本書，第一本係厚黑學，第二本係鹿鼎記，第三本係𧶽官所寫嘅小寶神功），之後再選擇行業，不要以為九紫火生八白土，就走去做土性行業，由於火性不定（離中虛），應以不實在嘅行業為主，例如炒炒賣賣，亦可找尋科技行業，或者重點與科技為主的業務。可以預見五術行業在九運中肯定可佔一席位（但係由於燥土不生金，要脫穎而出，必要有真材實學，寄望各位同學努力）。

在家庭中盡量給予女性權力，尤其是面臨重大決定時，最好多啲採納家中女性意見，公司裏面亦一樣，多聘用女性職員，對公司肯定大有助力。