己亥流年

         12 11 10 09 08 07 06 05 04 03 02 01
丙壬丙己 丁 丙 乙 甲 癸 壬 辛 庚 己 戊 丁 丙
午申寅亥 丑 子 亥 戌 酉 申 未 午 巳 辰 卯 寅

格局：

每一年都要做一次這樣的愚蠢工作，但大多數人都希望有一盞明燈，但這盞明燈多數都照不準的，因為大多數算命師都好貪心以為憑立春這八隻字就可以涵括曬天下萬事萬物，預測範圍由冰島至阿根廷都可以推算到當地的人事經濟，甚至乎國家元首的替換等等，都無所不包。

遇有某地發生天災人禍，有地震，海嘯，大型交通意外等等，立即大吹大擂，自己推算中咗，但永冇一個大師預測到某地什麼時間有災難，只話今年會有地震，大車禍等等，阿媽係女人的預測，個個都可以，其實由年頭預測到年尾係一件愚蠢事，但要預測到有幾成準並非不可能，先決條件就係要對該地有深切認識，另外最重要的在該地有一個明確的大家公認的地標，再根據地標的位置推算各個方位的吉凶，加上對當地的人文地域的深切了解，再加上立春八字，就可以有幾成準繩。

以前資訊未有這麼發達時，一般民眾都好容易呃，但當多數人都掌握一定的風水命理知識的時候，隨口噏已經搵唔到食。放眼本地的流年預測書籍，由最多時四十多本，一路被淘汰，剩下現在十本左右，就知道市場的力量，到今時今日仍然可以繼續出版的，相信都有真才實學，正式係經得起考驗，

但商業社會市場力量係絕對無情的，如果冇足夠的學養，只靠人脈關係要屹立到九運來臨，實在係一件困難事。由七運初期的大師級及教玄學的師傅風起雲湧，但一到八運大部分都銷聲匿跡，就知道市場幾咁無情。如果要由八運順利過渡至九運的話，請大家多加努力，將玄學提升至受人尊敬的層次。要用這八隻字推算出世界大事，的確係一件難事，但要推算一針之地的吉凶禍福，就只係小事一件，本地係一個商業社會，自然以經濟為主，至於其他事都可放在一邊，以前本地的優點很多，係其他地方所不能企及的，但這麼多年下來就只剩下一項優點仍然係其他地方沒有的。現在就以這八隻字推算本地本年的經濟上落，加少少人文事情，首先這組八字五行俱全，平凡之極，如果有一個小孩在這組命格之中，可以算係平凡人一個（官星殘缺不全，財星又不由自己控制，印星又左沖右剋，食神當令，經過沖沖合合之後，亦面目全非，比肩幫身冇力），如果拿這組八字來算命，只需四句說話就即可打發。

但現在是要用這組如此平凡的八字，推算一個地方的一年內如何如何，亦都係小事一件，首先每一地方都有幾個層面的人，就是管理人，富人，平常人等等，現就以這三種人的立場作一預測，希望有七八成準。

這個地方的管治權落在十個八個人的手上，我們只要不時留意他們的言行舉止，容貌動態，氣色的變化，就可以知道某一階層的人這一年的狀況如何，

因為本地理論上係不存在貪官，或者不存在貪眼前的有形利益，而會圖謀將來的無形利益，因為原局的己土根弱印旺，反映出這裏的官係一群冇膽的人，原因係七煞隱藏而不露，以及官星只有正財無偏財，所以都係一班循規蹈矩的人（起碼這一年是如此），但亦引伸出另一個特點，就係無自己的主意，無自己的立場（官星無明根），或者唔敢自己揸主意，這是一個印星過強的格局（火與土相比），每做一樣事都被安排妥當。

因為局中並無乙木出現，所以係唔需要帶腦返工的（唔需要鬥爭亦唔需要競爭），但白支高薪唔做嘢係唔得的，但基於本年的心態（並不是能力問題，而係環境問題），只會多做多錯，本年愈高級的管理人，請愈不要決定任何事，更加不要有創新意圖，否則相關的一群人必定好大問題（官星殘缺不全，官星的財星不敵印星，肯定有力使不出，所以最好唔出力）。

本年本地的領導層實在係太平的一年，因為原局係食神格，食神的特點係與官星相合，並不對抗，所以引伸為本年實在係太平年，但亦都係受氣的一年，（印重身輕，引伸為一定要聽話）。

本地的富有階層，在這一年內的確可以話係吐氣揚眉，亦都真正係財雄勢大，基於財可生官理論，有財之後自然想要名，地位，任何人都係只要有所圖謀，求自然要低頭，所以這一年這個階層的人最冇問題，因為他們最需要的是安定的環境，只要周圍環境無爭拗，自然可以悶聲發大財。

本年官星在他們掌握之中（寅同亥合），剋制自己的都變成生旺自己，亥同午合，引伸為官商大家合作愉快（官有益，要進行的事好順利，商有益，要搵錢無阻滯）。本年原局只有偏財，並冇正財出現，所以判斷可以發財的只有生意人，生意人之中只屬於有風險的行業，對於正正經經開間茶餐廳，洗衣舖，時裝店等等，都係艱苦經營，甚至乎在旺區開一間藥房都係得個捱字。

本年原局係食神格，經過沖沖合合之後，食神的原本面貌已經面目全非（寅亥合，寅午合，寅申沖），首先本地人對食的文化越來越淡，所以判斷飲食業經營艱難（食神合財而不生財，引伸為消費力意欲淡薄）。所以實鼓實鑿去做生意的確困難，好明顯低階層生意人並不在討論之列。同時這一年係財旺日弱，自然好難將錢放進自己口袋之中，但無論本年本地的營商環境如何，都係鼓勵有能力的人做生意，自古以來都係營商才是發達之道，但要有交學費的心理準備，只要有能力撐得過2019年，到2020年作為一般生意人，必定有好日子過，因為正財有力，就有利實實在在的生意人。

至於一般的低端人（借用新名詞），實在乏善足陳，因為本年的格局屬於「冇厘生氣」，身處低端階層，實在冇發展餘地（無發為能力），這個低端人口亦包括埋所謂中產階級，本地的中產階層只不過係一班高資窮人，無什麼可以值得羨慕的，實在係上不到天，下不到地，這班人大多數都有一份較為穩定的工作，但本年的格局並不令這班人有絲毫優勢，因為原局偏財旺，所以並不利打工仔，就算係打工皇帝，在這一年裏面都無優勢，其他如一般鐘點工，更加係受欺壓的一群。另外更有一班係食綜援的，唔好以為唔使做有錢攞好好玩，奉勸他們盡快，盡能力脫離這個行列（2021年辛丑），因為2023年就結束八運，進入九運絕對不利伸手牌，但什麼原因非現在所能算出。

本地亦有一班政黨人士，在這一年裏面，係被打壓的一群，因為原局並冇乙木傷官出現，己土官星雖然殘缺不全（無力），但亦冇傷官見官情況出現，引伸為這一年的爭吵聲音會少好多，寅木食神主動合官星，其中必有好多人轉軚。

綜觀這一年，一望這組八字，第一個感覺就了無生氣，過份平凡，以之作為立春八字，作為這一年的預兆，預示這一年的經濟，人事就真係唔樂觀，眾多行業之中，工廠的人手密集工業根本唔使諗，因為局中比劫弱，肯定請人難，最多人嘗試做老闆的飲食行業，呢個屬於經營困難的一種行業，食神左合右合加寅申沖，已經變曬質，引伸為本地已經好少人去細意欣賞食物，即係識食啲人好少，引伸為越來越多人食平價嘢，引致飲食業之間鬥平，肯定會淘汰一班人，可以堅持到最後的就可以生存（己亥年對飲食業並無優勢）。

另外就係炒賣行業，炒賣行業最重要的資訊，因為市場信息變化很快，無足夠快的的訊息，只可以買收息股，炒賣絕對不宜。另外如非行偏財運，亦不宜沾手，在這一年中的確有利炒賣行業，但壬水弱，丙火偏財旺，丙火偏財的根在寅午火局，顯示要有實力才可參與，亦即係背後如無正財支撐，只係表面風光（經不起風浪）。

本年的低端人士無幫無助（壬水弱而無根無印），實在並無什麼機會可言。一般人都將風水師，算命師當先知，對部分大師的言論作為金科玉律，但一旦衰咗之後就對玄學恨之入骨，但見近年群眾已經開始有少少智慧（八運裏面），不會再盲目相信世上有先知這回事。

總結這一年，除了財星之外並冇其他五行，所以這一年任何人都只可以向錢看，但並不是每個階層的人都搵到錢，而係只有放得下的人才可以達到目的，不論目的是什麼，如果放不下面子，道德觀念，就只有原地踏步，五行如此顯示，請自己選擇（原局印星無立足之地，用神亦非印星，所以慈悲並不適用）。

本年如果講搵錢，只係得四五六這三個月。本年只有十月乙亥係傷官見官，略有鬥爭之象，乙木坐亥，但亥與寅合，亥與午合，全都轉化成財星，並無殺伐之氣，如果要鬥爭根本全年都冇機會，所以反對派喺呢一年係可以講係無用武之地，應該掩旗息鼓，積聚實力等待下一年再出擊。

既然係預測，少不免都要從俗，最多人關心的樓市，而樓宇係不動產（因為冇得炒已經好耐），就算下跌一兩成都係好少的一件事，唔好大驚小怪，如果望樓價跌到一般打工仔都可以買得起的，根本係唔實際（關師傅金句：望樓價跌，不如望自己行運），因為樓價係無可能大跌的（原因炒家極少）。

另外最多人關注的股票市場，因為本地的經濟並冇自主權，所以只可以望住美帝紙老虎的走向，以及鄰近地區的上落而上落，有咁啱兩個地區都各有特點，美帝紙老虎有個癲人主政，不按常理出招，都幾難預測（佢的位置今年處於六白金位，佔盡優勢）。

而鄰近地區的領導人並冇固定立場，隨自己權位穩固與否而隨時改變，所以對經濟發展亦飄忽不定，作為本地一個小小小人物，去預測這兩個龐然大物點樣諗嘢實在多餘，但都可以用五行推算本地股市的點數（方法有少少保留，因為未到好準確階段），根據原局五行演算，頭兩個數字應該係2及2，引伸為唔見到二萬二千點，或低過二萬一點都驚都唔使驚（大手入貨機會）。

但如果真係見二萬一點就有可能出現人踩人現象，但以本年這八隻字如此平庸，唔應該有咁刺激的場面出現。本人主張短線，永遠不要與股票談戀愛，記住股票只係搵錢工具的其中一種，我所講的係實股，其他衍生工具一概唔識，請不要來函詢問。

至於好多大師話逢九有災之說，我根本唔信，除了1919年的五四運動，

甲戊丙己
寅子寅未

1949年中華人民共和國成立，

壬乙丙己
午丑寅丑

1959年文化大革命，之後餓死幾千萬人之外，再無什麼大事出現。

辛丁丙己
亥巳寅亥

2019

丙壬丙己
午申寅亥

可以比較一下。