九運第一年

九運第一年（一）

庚戊丙甲
申戌寅辰

地運循環，小三元隱藏在大亖元裡面，未來的九運就係一個大三元的終結，由2044年開始，就迎來下一個大三元，年青人真有福，可以橫跨兩個大三元。

理論上由2024年2月4號開始就進入了下元九運的第一年，術數師就利用三元九運的卦象五行，來判斷未來二十年的吉凶，要做到純以地運五行來推算吉凶係不可能的，因為人有主觀成見，亦受週圍的環境所左右，更加會被當前的境況所影響到（例如世界局勢，經濟指數等等），所以不可能做到超然物外，就正因為如此，所以人在地運中，就會受到地運及流年的境況所左右，更加會受身邊的朋友及自己接收什麼資訊，會影響到自己的判斷力。

未來的地運係九運，卦象係離，五行屬火，離中虛，表示不實在，同火的無固定形體一樣，所以九運給與一種負面的印象，正是大部份人都認為九運會比八運差。

風水的理論就係山管人丁水管財，而九運的基本條件就係坐南向北，南方有山，北方有水，符合這個小小的要求，就係一個好風水的地方，而香港周圍都有好多這種地方，例如台灣，新加坡，澳洲等等，唯獨香港先天性缺乏這種地形，可以講係輸在起跑線，經濟自然停滯不前（漢民族自古以來都以中土自居，順理成章自然以水為財）。

以前好多地方都仰望香港，但曾幾何時本地的步伐漸漸慢下來，甚至不再向前，以前行路好多時都會被人踩鞋踭，今時今日想踩前行者鞋踭都追不上（無晒動力，無晒衝勁），連董伯伯當年口中的小弟弟，都比香港行前了幾丈遠，何以淪落至此，原因實在可以寫一本書。

上一個小時的事都已經變成歷史，無謂去想點解，與其諗點解連台灣的加權指數都走在恆生指數前面，不如諗下點樣改變自己先啦。不去想以前的事即係不讀歷史，只不過係一句負氣說話，讀歷史的最大得益就係識得吾日三省吾身（送一個買蛇羹的故事給大家）。

將三省吾身放大少少，在八運裡面有否做過違反地運的事：八運五行屬土，土主信，亦主守法，當好多人都無守信，無守法（有法不執法亦都係犯法），社會狀況自然偏離正道，只有愈來愈差。

九運五行屬火，火主禮，最低標準就係不講壞話，包括不講自己人的壞話（破壞感情），自己間屋的壞話（千萬不要憎自己間屋），不要背後講某君壞話（雖然好憎佢），不要講自己所處社會的壞話（不滿意就離開，不要將大好光陰浪費在不滿意的地方，一生人的青春實在好少）。

流年係甲辰，七煞年份，七煞最忌內鬥（七煞無情），所以只宜對外（但係漢民族最喜內鬥，匿埋在長城裡面自己打自己，歷史好好玩）。

九運的特色就係不實在（離中虛），躍動不定，最忌宅在家中，離卦為中女，引伸為女性運氣會比男性好（當時得令），可惜因為本地北方無水，可以預見中年女性的運氣轉差，要在衰運群中脫穎而出，擺脫地運的安排就必要多動（配合地運卦象），究竟如何動才算配合呢？運動？旅行？舉家移民？有誰可知天機。

甲辰年，丙寅月，戊戌日，庚申時，睇完上面幾隻字，差不多可以斷定我對九運的第一年係持負面態度，木火土霸佔了大部份位置，以地運的標準就係強木生火旺土，金水嚴重不足，一睇這八隻字就知道不會有什麼好事出現，甲寅對戊戌，丙寅對庚申，真係希望有個BB在這個時辰出生（2月4號申時尾），追蹤住他的成長過程（要等後生仔去做）。

九運第一年（二）

不知不覺，傻吓傻吓就進入咗九運，個人完全無感覺，但放眼世界，已經展開咗變數的帷幕，世界事大多數都掌握在幾個偉大人物手上，我等小人物只祈望佢地唔好發顛，但死鬼子佬地方毒品氾濫成災，仲要將之合法化，個個返工之前都要啪番幾粒，想唔發顛都難。

都係俾心機推算吓自己所處的地方運氣如何，希望可助己助人，本地的風水係迴龍顧祖局，最初開埠的年代，土地上面什麼也未有，所以亦產生不到作用，但時代推移，土地上面愈來愈多野（人，樓宇，貨物，汽車等等），迴龍顧祖的風水作用亦愈來愈大，由上世紀六十年代，發展到現在都未有停止，本地從來都係奉行有土斯有財，所以物業一直有價，其中都經過幾次起落，但每一次跌低再起來都比上一次升得更高，所以肯留下來的人，財富不斷增長，相對那些拎住舊冰去外地生根的人幸運得多。

世界定律係唔會變的，盛衰一定循環，盛極必衰，本地的土地興盛了幾十年，造就了無數富豪，但不知何時俾領導人覺得高過籠（真係高得滯嗎？），就立刻出了一招叫（辣招稅），就真係有效，土地成交數量應聲下跌，之前成交數量不斷上升，實行（辣招稅）之後，成交量就拾級而下，一升一降之間，自然影響到一部份人的既得利益，自然群起而反對，嘈得幾嘈，就拖泥帶水地減辣一半，當初不顧反對地出招，就預咗有人反對，現在稍有反對聲音就立即縮紗，非官家所為。

我作為一個風水從業員，眼見本地經濟淪落到如此地步，皆因缺少咗自主權，連當年董伯伯口中的小弟弟都俾佢超前幾條街，突然間出現咗一個機緣，可以自己楂主意出吓辣招，一定唔可以撤回（呢兩隻字係管理層大忌）。

世界不斷在變，但風水格局係唔會變的，雖然在九運裡面本地並無什麼優勢（欠缺北方有水格局），但只要太平山仍然巍峨屹立，入水口仍然無阻，出水口一樣暢通，迴龍顧祖格局仍然可以發揮作用，所以香港好，中國好就肯定永遠不變。

我對香港好，中國好所持的風水理論就係：港口水夠深，領導人仍然住在前政府所建的府第內，無論經過幾大風浪，都會好快復原，而且比上一次升得更高。（董伯伯無住進前朝府第，當世界經濟打個冷震，即刻腳痛，仲俾人加一個八萬五的罪名俾佢，｛佢推出八萬五有錯咩｝）。

我作為一個風水從業員，深知自己命格高低，能夠承受得多少，所以從未從事投機炒賣，對周遭事物只以冷眼觀察，發現手上物業愈多就愈急於撤辣，因為香港的風水格局幾十年來造就了太多隱形富豪，究竟銀行存款有幾多？我等小市民無可能知道，但估計應該係用萬億做單位，遲早要拎出嚟買物業（因為無其他生意可做）。

香港的聚富之地並唔係一般人可以進駐，但幾個發富之地人口不斷增加，能力自然愈來愈強，在九運裡面慢慢積聚，等到上元一運，香港肯定又一次站在世界頂峰，到時人事幾翻新，細節現在當然唔會知道（無人可以知道天機），但係大局無變，就會循住呢個方向行，唔係有形之手可以改變的。所以撤辣與否根本唔重要，買唔起的撤唔撤都係買唔起，買得起的撤唔撤都無所謂，身為領導人應該試吓掌握主動權的過癮心態。