金鎖

大量之人眉高眼，眉眼相定不憂悲，眉粗眼細不相當，寅年吃了卯年糧。

眉壓眼嘅人，除咗分辨能力差之外，重係氣量小嘅表現，所以眉眼嘅距離大番少少，個人樣樣都可以睇開啲，加上眉有動象，眼頭有番咁上下尖，就唔單止有量度，重有番咁上下嘅分辨能力。眉眼相定，就係眉眼相配，在面相上面眉眼所佔嘅比重超過一半，包括咗兄弟宮、田宅宮、子女宮、夫妻宮、疾厄宮，重有最重要嘅印堂，即係命宮，面相十二宮之中佔咗六個，如果眉眼部位生得靚，眉眼相配，就真係一世都唔使憂。眉粗眼細不相當，眉眼唔相配，唔相配無問題。呢度嘅不相當係指眉粗壓目，除咗鬼佬之外，因為鬼佬雙眼好深，眼深不忌眉壓目，但係眼平就最忌眉壓目，呢啲人田宅宮窄，窄就肯定佢先使未來錢，如果再加上眉心濶，唔使講就一定會俾人呃錢，唔單止先使未來錢咁簡單。

印堂三表是鎡基，只怕下長來犯之，假如水星來救護，不教人受此寒饑。

表︰係表表者，即係最好。鎡基︰即係根基。印堂三表︰即係印堂有三樣野最緊要，第一無紋，第二要寬濶，第三要飽滿。即係印堂係成塊面裡面最靚嘅位，下長就係印堂下面有横紋，印堂下面有横紋就係疾厄宮有横紋，無論命宮點靚都無用，因為有横紋就令到印堂嘅氣唔能夠直沖財星，一生人必有一次大波折，就會令到下半生好潦倒，但係如果有個靚嘅口，即係水星，就會對晚年嘅運氣有所幫助，所以口形靚係著數好多。

上頭雖有些模樣，下停不均卻壞之，鶴腳之人成小輩，蠻蹄孤子是婆姨。

鶴腳︰即係直，蠻蹄︰即係平扁足，婆姨︰即係工人。上頭同下停相對，即係上停好靚﹐下停唔得，例如甲字面，額同眉眼生得幾靚，都係上半生嘅事，如果下停生得差，晚年點都無咁好，呢度嘅不均即係同上停唔相配，浄係上停好，下停唔好都係好煩嘅。鶴腳即係無腳瓜廊，一支棍咁嘅腳，就係小輩，呢個小輩並唔係晚輩，而係做細嘅，所以一般人話好靚嘅腳就代表咗呢個女人嘅婚姻一定唔美滿，所謂唔美滿係話坐唔正，凡親腳靚嘅女人，就算做得到元配都唔到尾。蠻蹄孤子即鴨腳，呢啲人以前統稱賤，即係低級，話呢啲人智慧低，同時無魄力，最主要就係唔可以長時間工作，好容易攰，智力較為差啲。

八歲十八二十八，下至山根上至髪，有無活計兩頭消，三十印堂莫帶煞。

呢度係講少年運，八至十八係細路嘅運，只係反影咗父母嘅運氣，同埋自己嘅身體狀況。但係十八至二十八呢十年就唔同，位置就係成個額，所以話由山根至額頂，話計係智慧，有無智慧就要睇額嘅兩邊，兩邊額角飽滿，就自然有智慧，如果兩邊額角向下凹，或者向後退，就自然代表呢個人無乜智慧，凡事唔會由大處着眼，只係執著在啲小事上面，浪費好多時間。三十印堂莫帶煞並唔係話印堂位係三十歲，而係話想少年行運，印堂一定唔可以帶有煞氣，如果有煞氣就唔使慌在三十歲前有運行，乜野係印堂嘅煞氣呢，包括咗凹，有直紋，有横紋，有毛都係印堂嘅煞氣一種。

下頦趫大旺末年，邊城不佐也無錢，數年荒寒不欠米，只因上下庫相連。

下頦即係地閣位，邊城即係兩邊理財位，上下庫即係額同地閣。下巴突出而厚，即係豐滿嘅鞋抽形，呢啲人晚年一定安定，但係唔表示有錢，要安定而又有錢，就要兩邊理財位夠飽滿，有飽滿嘅邊城，就係邊城相助，而理財位飽滿嘅人，用錢就無咁疏爽，所以多數都有錢剩。數年荒寒即係大圍唔好，其他人個個都唔好嘅時候，自己都好充裕嘅，就係因為上下庫相連，額頭飽滿而下巴尖向外少少兜住，就算外圍環境幾差，都唔會影響到自己。呢度係講額同下巴，相連只不過係形容詞，實際係地閣朝天，即係下巴厚，向外突出，而額頭飽滿就叫相連。

鼻樑露骨是反吟，曲轉些兒是伏吟，反吟相見是滅絶，伏吟相見淚淋淋。

反吟係人與人之間嘅事，伏吟係錢嘅事，相見即係明顯。鼻樑露骨即係有節，鼻有節一定係人與人之間嘅問題，大多數都係夫妻間嘅問題，個節越明顯表示問題越大，鼻樑有節通常都應在40歲之後，44歲之前一定要好小心處理夫妻間嘅事。伏吟係歪，所謂曲轉些兒就係成個鼻歪，相見就係好明顯，鼻歪係成個鼻，唔係鼻嘅某一部位，鼻為財星，一定同錢有關，鼻直而豐厚，就肯定錢財得來容易，如果歪即係財星破，就一定在一生人之中必有一次或者多次嘅大損失，並無規定在某一流年，越明顯所損失就越大。

眼兒帶秀心中巧，不讀詩書也可人，手作百般人可愛，縱然賣假也成真。

人聰唔聰明就係睇雙眼，只不過呢度嘅「秀」、「巧」好似係為女人而設，但其實並無分男同女，只不過話只要有足夠嘅聰明，就算無讀乜野書亦都可以善解人意，如果又聰明，又有讀書，就唔單止可人，眼睛俾人覺得有秀氣，就一定要有條件，首先要有一道靚嘅眉，第二就係眼形長，眼尾微微向上，重要加少少眼水，唔可以乾，就俾人覺得呢雙眼會講野。手作白般並唔係用手做手藝，而係聰明人可以呃啲蠢人。

薄紗染皂出栗米，緃有妻兒也沒兒。倘見山根高更斷，五年三次路邊啼。

薄紗︰有層野蒙住。皂︰黑色。栗米。一點一點，雀班。呢度係講眼嘅色，眼睛最忌混濁即係黑白唔分明，包括咗黄濁，灰濁，好似有層野蒙住，眼神唔清晰，染皂即係黑色，唔單止雙眼濛矓，重有個黑眼圈，栗米，黑眼圈嘅周圍有一點點，呢度講一個人嘅色慾過度，眼白濁，眼圈黑，有雀班浮現，就表示呢個人嘅色慾心好强，完全無自制能力，由於消耗過多，所以只係有老婆，而無仔女。山根高更斷，山根突然間折斷，好似一把曲尺，容易招惹是非，無規定在邊一年，只係話只招惹到是非，就會連續不斷，一直繞幾年，所以山根嘅線條唔夠順，就要小心，無端端招惹麻煩。

無家可靠羊眼睛，卻問他人借住場，更有禾倉高一寸，中年猶未有夫娘。

羊眼︰即係白多黑少，禾倉即係吹火口。羊眼嘅形格，白多黑少，在羊嘅身上就好純良，但係在人嘅身上就好呆滯，人眼好似羊眼咁呆滯，都唔使講梗係好霉，揾到食都揾唔到著，所以話問他人借住場。禾倉高一寸嘅禾倉就係食祿倉，高一寸，係吹氣嘅形態，講野嘅時候有咁嘅口形，就肯定將黑變白，呢度話中年未結婚，未必啱，因為呢啲人鐿意顛倒是非，唔知佢邊句真，邊句假，呢啲相嘅口形有個特點，就係唇形略帶圓形，上唇無咗條菱線，就咁一條直弧線，有呢啲特微未必就係吹火口，但係吹火口嘅人必有呢啲特徵，呢啲人講野完全信唔過嘅。

眼下凹時又主弧，陽空陰沒亦同途，卯酉不如雞卵樣，只宜養子與同居。

眼下凹即係子女宮低陷，代表咗子女微薄，或者無仔女，所以話孤獨，子女宮低陷包括有紋插破，仔女就算有都唔會在自己身邊，或者情唔向自己。陽空陰沒，卯酉不如雞卵樣嘅陽、陰、卯酉都係代表咗兩隻眼，係鴛鴦眼，大細眼，眼睛左右唔同就連帶子女宮都高低唔同，有呢啲形格就唔好追仔女，最好就係收養，或者契番幾個仔女。

下頦尖了作凶殃，典卻田園更賣塘，任是張良能計策，自然顛倒見狼當。

不頦即係下停，或者直接指下巴，下巴尖就晚運差，無論係也野形嘅格都係唔好嘅，以前有啲書解木形火形就可以下巴尖但係實際都係差嘅，呢度話典却田圓更賣塘係話保留唔到自己擁有嘅野，跟住話任是張良能計策，就係話呢個人一定好醒目，因為凡親下巴尖嘅人，即係甲子面，額頭一定飽滿，廣濶，聰明，多計，但係隨住年齡嘅增長，過咗中停嘅年齡就一路差，自然顛倒見狼當，唔使行到下巴運，只要一進入下停嘅流年就自然好多野都判斷錯誤，因為甲字面嘅人無耐性去做啲慢慢收成嘅野，較為鍾意冒險，搵快錢，當呢個人行運嘅時候，判斷啲野梗啱嘅，但係下巴尖就代表咗思想唔夠全面，就算經驗點好，都會有啲遺漏，所以話見狼當，狼當就係兼顧唔到，顧得呢樣顧唔到另一樣，支支助助攪到無為止。

眼珠暴出惡因緣，自主家時定賣田，更有白睛包一半，也知不死在床前。

眼珠暴出即係凸睛，姻緣，唔係男女之間嘅婚姻，而係講所做嘅野，白睛包一半，即係訓覺唔合埋雙眼。眼睛微微凸出，呢個人就一定鍾意講野，但係呢度暴出，唔係微凸咁簡單，暴出就代表咗脾氣暴燥，鍾意講野，脾氣又差，就自己種下好多唔好嘅因。自主家時定賣田，多數都係因是非或者官非而破財。更有白睛包一半，訓覺嘅時候合唔埋眼，就先天性容易遇到意外，呢度話更有，即係連埋上面嗰啲缺點，鍾意講野，脾氣又唔好，訓覺又合唔埋雙眼，招惹意外嘅機會就大大提高，所以不死在牀前。