命理性格篇
命理性格篇（一）
戊癸癸甲
午未酉辰
性格：
因時干戊土正官透出有根，全局最有力就係正官，因此爲人忠厚老實，奉公守法，當然亦容易因爲公司業續的好壞，而造成自己情緒的起伏，加上近年生意日差，老闆爲公司業績及生存所苦，而本命的心情就很容易受到官星的影響。
因為印星有力，所以對家庭好重視，就更加緊張份工，對自己的壓力更加大。原局傷官無力，不足以生財，所以性格唔夠樂觀，亦都係唔夠膽，所以咁耐都無跳槽，諗住同公司共存亡。原局丑酉合化金，午未合化火，即係財印對立，印星的力大過財星的力，推論佢自細受亞媽的教育入晒腦，所以性格保守。
癸辛癸癸
巳未亥未
性格：
金水傷官格又見三個食神透出，自然聰明醒目，相貌俊秀不在話下，重有口舌便給，辨才一流，多才多能，做野快手快腳。八字身弱被泄太過，做事衝勁不足，缺乏耐性，不夠細心。四柱陰星多無火透出，個性機心重而記仇。四柱金生水旺，且食傷強而財極弱（亥中甲木財星弱極，不足以承接食傷的生旺，變成水多木飄），形成日主熱切追求財星，除左對金錢好緊張之外，自然花心好色（如果無財星泄食傷的力，自然就會剋制弱到不成氣候的官星，對呢個世界樣樣唔滿意，尤其是老闆，食傷強旺者的通病）。
辛甲戊丙
未午戌戌
性格：
甲木日主生於強土月份，因為係甲午日的關係，由土強變成火強，由於木生火旺，性格上永不服輸，遇強愈強，不論讀書或者做事，都要做到最好，係最理的員工，但在交朋結友方面就差了一㸃。但在學業上屬於傷官生財格，五行欠水，由於火旺關係，形成性格上唔服輸，愛面子，雖然唔係讀書的材料，但都會好努力，每事都博到盡。
乙己庚辛
亥丑寅丑
性格：
正官格為人誠實，性格內向保守。食傷歸庫，制官煞之力不足，亦即係傷無力，唔夠蠱惑，唔識轉彎，唔識得在適當時間表現自己才能，以致容易錯失機會。財星受剋受泄，俾官星合住，是為財弱，影響交際手腕，亦代表膽量不足，比肩入妻宮，不得妻子助力，正官合財星，做事勤奮，可得上司賞識，但搵錢能力一般。命格以丙丁火生日主為用神，遇天干丁火則暖局無力，天干丙火則俾辛金食神合住，地支行巳火大運則會沖冧財星，行午火大運寅午會火暖局，但亦俾財星會住，本命財星有意無意之間將日主的好運破壞無遺，實在無可奈何，只有行全火之運或全火流年始有好轉機會，但一生行唔到全火大運，缺乏樂觀性格，貴人無在適當時間出現，所以成就有限。
命理性格篇（二）
辛癸癸丁
酉未丑卯
性格：
原局有金生水，聰明，容貌秀麗，富學習力（都係丁火的功效）。地支卯未，酉丑各自半合，但都係墓庫之合，丑未沖夫宮，命學理論係合可解沖，變成沖不為害，但墓庫之合係解成事情遲緩發生，所以首先係婚姻較遲，跟住仔女亦都係年紀較大才生，估計第一個係女。
以財為用神性格自然爽直，有正氣，做事爽快，爲人熱情，但外向，好動。
命學格式：「局中有煞先論煞」。原局有兩個七煞重係當時得令，可用時柱偏印化煞，即係命學所講：「印會煞，富責極品」命格，所謂印會煞，即以印（權威）化煞（小人），使小人降服，進而使印星生威，故煞印相生命格，除自己本身有領導能力之外，更可獲小人之助力，爲富貴之好命。女性論命以夫星，仔女星及自身三者兼備爲最好。
甲丙丙壬
午子午寅
性格：
本命身強，以印星為忌，性格獨斷獨行（唔鍾意有人俾意見）。日坐正官，有七煞透出，原局無財生官，無爭取權力之心。
食傷隱藏而無財星發揮食傷的力量（食傷生財），本人的交際手腕好一般（引動食傷的交際能力）。食傷無力制官煞，唔會主動追男仔，或者係男女感情上處於被動狀態。
因為七煞的根係子水，力量專一，對於追求的目標好明確，唔會中途而廢，所以呢個人想做什麼事都會成功，分別係符合本命五行就容易成功，唔符合本命五行就會多點波折，同埋時間較長，但成就會一樣。
丁丁戊乙
未未寅未
性格：
本命丁火生於正月，正印當令，乙木偏印透出，戊土傷官透出，通根於地支
四位，其餘地支三未所藏己丁乙全部都係木火土，全局無一點金水流通其氣，過於炎燥。本人性情固執偏激、脾氣躁烈（無濕土），虛榮（身旺無財自然係要追財），寡情（排斥印星），好逸惡勞之人（食傷制官）。
比劫天透地藏，食傷旺，但屬於無生氣的食傷，（因為無財）交遊廣闊，但往來多爲酒肉朋友（比劫不是用神）。地支三個食神，月干傷官透出，伶牙利齒，都係得罪人多，兼夾八字無財，應驗了（食傷雖巧，無財亦貧）這句話。本命結構行財運時會風光，但運過不留財，有可能會更慘，故晴時當積雨時糧，應多爲晚年打算。正偏印雖可壓制食傷，使其個性不越本份，日主通根於全部地支餘氣，可算身旺，自然忌印，父母長輩助力不長。命中無財生官，不喜被約束，恣意而爲，有過而不知。命中無財，所以傷官雖然有力，但亦發揮唔到效力，雖然口才好，但都係得罪人多稱呼人少一類。
命理性格篇（三）
辛乙甲壬
巳酉辰子
性格：
日主乙木，月支辰中雖有乙木為根氣，但子辰相合，辰酉相合，合即相絆，乙木之根全無。無根之乙木，性格自然搖擺，做事無主見，雖有傷官生財，但傷官與財星都被合而發揮唔到特有的作用，雖聰明但多藝而不專。本命身弱仍然要傷官生財為用，即使家中有錢，亦注定係勞碌之人，無經濟概念，身弱自然喜歡花錢。
乙木特性係鍾意霸佔，原局金水多，主聰明美麗，雖聰明但易左右搖擺、見風使舦，無一定主見，只係善於模仿。
年柱壬水通根在子辰，水主智慧，所以善於謀略、有策劃力、傷官生財自然反應快，七煞會局有印星化煞，心性仁慈亦喜歡幫助人，觀察力強，有分析能力，屬於心慈性急一類人，且性格非常善良，因為基於乙木的特性，所以都幾重視金錢、地位、名聲，計較心較重。
原局金同水都成局又有透出，自然聰明機靈，善於社交，有說服力及演講才能。本命在外表上給人一種快樂、迷人的印象，實際上係煞重身輕，脾氣暴躁、自私、佔有慾強，用美麗的外表掩蓋住自己的缺點。因為身弱煞旺，又行唔到幫身木運，自以為好有才幹，成日覺得呢個世界欠咗自己，言談之中不自覺表現出樣樣唔滿意。
辛丙己丙
卯寅亥子
性格：
身弱之命最容易受外界影響，以官煞的影響力最大，其中又以七煞的力量大些，正官變成幫旺之物。印星亦有一定的影響力，日坐偏印，時支正印，正偏印與七煞相合，相合之後化成印星，可惜無印星透出，又不當令，所以不能取代七煞對日主的影響力。天干傷官以寅中餘氣為根，時柱正財被比肩合住，同時又無根，所以財星在本命中力量最少。原局亥月寒火，自然要丙丁火暖局，時令己過中氣小雪，接近大雪節，丁火的作用不大，必以丙火為主要用神，所以比肩的影響力對本命好重要。本命除了財星被合而又無根之外，其他如傷官，比肩，正偏印，官煞等都對日主有一定的左右能力。男命以財為父，偏偏財星在本命裡最無地位，所以首先唔將老父放在眼內，但並非睇唔起老父（老父都係飽讀詩書），偏偏就係當老父無到。原局並無一樣五行可以獨大，因為天干有的地支無，天地不相溝通，就會俾大運，流年影響全局，大運可以左右命格，可以話大運出現什麼十神，自然會牽動全個命局，進而影響日主。
例如第一個庚子大運，庚金係偏財，偏財為父，老父自然行運（因為原局的財都俾其他五行合住），偏財主動，本人亦都好醒目，俾人覺得這個小孩好精靈。到子水正官運，可以判斷可進入一間好學校（因為童年只不過係讀書及健康的問題），到十四歲辛金正財大運，由這個運開始就顯現反叛性格。辛金以亥水為傷官，同時辛金係日主的財星辛金亦都引動晒成組八字，其他五行並無這個力量，只有辛金才可以。例如行水運，原局除水之外，最旺就係木，只不過係水木傷官，而水木傷官最大特點就係得失之心太重，每事都要衡量輕重，正式係乜都要睇吓有無著數，就俾人覺得呢個人數口好精，但水運不足以牽動全局。
丁辛辛丁
酉未亥巳
性格：
日主辛金生亥月，水冷金寒自然以丙丁火作為用神，年月柱天剋地沖，丙丁火受傷無力制金，原局無木通水火之關，水火不能兩用。年月沖動，多屬不居祖屋或在家待不住。八字金旺氣寒，水與火戰，性情衝動不仁、好逸惡勞、逞勇鬥狠，難以馴服。
31歲前都係行比劫及正偏印運，容易誤交損友，惹事生非（傷官見官禍百般），影響學業（排斥印星）。一般男女命八字結構身旺者，若有傷官見官貼近相沖，無財可化者，大多心態不平衡（整日埋怨為何人有我無），行事不依常理，流年大運再遇沖激，不能免禍，身敗名裂者有之。
乙乙丁辛
酉卯酉酉
性格：
煞強身弱的命，必有非常的鬥志，日主生旺這一點小小的丁火食神，說明了這個人只要有一點小小機會都不會放過，七煞格的人天生反叛，日主與七煞相比，自然係非常弱，但與其他十神相比，就強得多了，強就自然有控制力，強自然要泄，所以只要有些少機會都要爭取表現，而丁火食神係本命的用神，所以只要遇到小小外力生助，就自然會發揮食神的正面作用，食神的作用係生財制煞。原局七煞最強，當然不可以倚靠小小的食神制強勁七煞，制煞雖然不足，但可以生財，因為命中無財，並不表示這個人不喜歡錢，或者搵唔到錢，因為食神之力只偏向生財，同時七煞強勁，亦都引動財星，只要見到財星的大運或流年，強大的七煞就會將財星引出（並非本命有特權，其他命格亦是一樣），凡一種五行獨大的命，都可以左右全局，原局無財，七煞可將財星引出，先決條件就係有財出現，不管大運或流年，都會得到財星的之力。原局無印，因為煞生印，大運或流年見印星，就可以得到印星的作用。本命五行欠二，但亦算得係好命，就係有命中見不見之財，俾佢遇到，命中有見不見之印亦俾佢遇到，如果日主虛浮無根，就不會有這種幸運。
本命七煞格，雖然係身弱，但日主都有根有比，弱中帶旺之局，並非全無自主之力，七煞格的特質就係性格強硬，遇爭執不容易妥協，好容易將一件事弄得無彎轉，所以這種人絕對不適宜擔任對外或者擔任公關的工作。行運之時憑其強硬作風及執著的性格，自然可以迎難而上，做到其他人做不到之事，當行衰運之時就一沉百踩。這種人的人緣只屬一般，一生不會有太多朋友，加上性格固執，有困難未必有多少人願意幫忙，所以很容易就自己困住自己。本命七煞為忌，財可生煞，自然連財星亦不是用神，行財運的時候，因為財星是代表膽量，而財星在本命裡是負面的作用，所以自然會錯用膽量，應該放膽博的時候退縮，應該守成等待時機的時候反而不肯等待，自然係擔沙塞海。
本命身弱自然需要印星，當七煞發揮作用的時候，自然要印星幫身，即係回家找尋助力。原局無財，先天性對錢的觀念不夠清晰，即係不懂得如何運用金錢，不懂得如何將錢用在有回報的地方。原局有食神透出，日主雖然有根有比，但都不足以對抗如此強勁的七煞，就好自然地轉移去生旺食神，所以本人好喜歡爭取表現，食神同七煞相比，自然相差很遠，所以本人要有所表現（因為食神主要係生財），就要搵到錢俾人睇，就一定要借助外力，原局比肩坐煞，朋友自然無力，妻宮（家庭宮）係比肩，自然係問屋企攞錢，好順理成章地推算出屋企幫佢開展事業。
己甲己丙
巳戌亥辰
性格：
亥月偏印當時得令，局中一片火土，將亥水剋住，印星的力量不足以影響日主，自然在性格上表露出來，本命的財星剋制住印星，這個人自然無甚麼文化，亦不會有甚麼愛心，因為財星的力量佔據了大部份的位置，財星的缺點亦都曝露了出來，這組命格地支全部係偏財，連巳中所藏的都係偏財，但偏偏天干透出的都是正財，所以表現出來的是正財性格，而正財的特質就係規矩搵錢，唔會走捷徑，但支持正財的力係偏財，所以這個人的本性係鍾意搵快錢，唔鍾意腳踏實地去慢慢積聚金錢，由於財星係忌神，自然有晒財星的負面作用，例如性格輕浮，內心不能藏物，事情未做就已經事先張揚，講話急速，樣樣以錢為本位，說話多到自己講過乜都未必記得。財星的作用係生官煞，但原局的七煞隱藏在餘氣裡面，主要係巳火裡面（因為巳係金的長生位，而藏干都係順生），但亥巳一沖，就將裡面的七煞沖散（生方怕動），還有戌中所藏的官星，辰戌沖，沖出官星（庫宜開），但天干無官星相應，亦都係太弱，泄不了旺而有力的財星，所以財星就影響晒這一組命。食神丙火透出，以巳為根，是為食神有力，食神可生財，而又有財星俾食神所生，是為食神得用，既然食神得用，自然口才不會太差，因為財星係忌神，自然連生旺財星的食神都變成忌神（亥月先天性係要火，所以食神在另一方面都係有用之物）。
本命的官星似有若無，因為土過厚，所以官星永遠不可以產生對日主的制肘，不可以將財星泄弱，（官星的作用就係產生一種制度，）有人管自己，而自己亦可以管人，做成一種互相制約，現在官星完全制約不住日主，即係這個人不會守規矩，腦裡面只係想著如何搵錢，因為財星制印，所以對學習亦無甚興趣，連點樣可以搵錢的課程都唔會去聽，最好就係按幾個制就可以搵大錢。本命除官星之外，最弱的就係甲木日主，命格弱的很多事都做不到，書上有講（身旺可任財官），即係日主要有力才可承擔得起財星的消耗，抵受官星的壓力。財星係日主所剋，即係我所控制，就必要日主有力才可，現在日主弱，日主的力量同財星相差太遠，自然無可能控制住財星，所以財星會隨住日主的大運去佢想去的地方，總之就唔入日主個袋。本來財旺身弱的人為了追錢，就會做出很多與常人不同的舉動，未必係犯法的事，但係都俾身邊的人覺得（為咗錢使唔使咁呀）的感覺，這種人雖然很狂熱地去追錢，但另一方又唔會慳儉，因為原局官星無力，但凡官星無力的命，不喜受人管束，但亦無自制能力，不能控制使錢的慾望，身上有少少錢都要使埋先至舒服，（本命雖然係身弱，但都比官星有力），所以凡財旺身弱官星無力的人，好難靠自己剩到錢。但這一類人都有發達的一日，就係要靠運，當運到的時候，真係會搵好多錢，但運過之後通常什麼都無發生過。
命理性格篇（四）
丙己己庚
寅未卯子
性格：
七煞格，日主失令但並不弱，因為有根有印，成身煞兩停格局，個性果敢剛毅，頗爲自負，鬥心強，報復心更強，舉止言行男性化。正印透出貼近日主，並受地支寅木生扶，記憶力特強，具有讀書之天賦，如第一，二個大運係印比的話，讀書成績一定名列前茅，亦會得師長歡喜，本命前兩個大運正係印比，所以好順利考上大學。傷官無根，七煞合局無制，性格強硬，唔鍾意虛偽裝飾，處事態度直接，無包容性，黑白分明，不論同性或異性，只要有少少出錯就絕對唔俾面，一生樹敵不少，年青時待人接物禮貌尚可（？），年紀愈大，性格愈掘，工作或事業則可憑才能魄力達至高薪厚職，但婚姻及家庭則要圓滑與包容，如此性格自然對婚姻有妨礙，周圍人情世故亦不得和睦，所以朋比的助力不多。
辛丙庚丁
卯寅戌酉
性格：
食神格者，生性聰明，學習能力強，亦都學有專長，尤其具有藝術設計方面的天份。正財合入日主且有偏財幫旺通根酉支，又有當令食神生扶，本命有商業手腕和經營管理之能力，正財有力，勤勞而節儉。火生燥土，五行欠水，亦欠傷官，性格表裡如一，完全缺乏女性嬌柔一面。時支雖坐桃花，但爲正印桃花，性格端莊高雅，但命中欠缺官星，異性緣只屬一般。
丁壬甲癸
未午寅亥
性格：
食神格，食神本質係生財，財旺自然破印，本命欠缺印星，而印星係代表文學，仁慈心，鍾意將複雜事情簡單化，樣樣都喜歡順其自然，現在欠缺印星，做事自然唔鍾意慢慢等，亦都稍欠慈悲心，食神代表鬥心，食神生旺財星，自然鬥心強烈，所以對搵錢較為熱衷。
由於壬水日主的根亥水俾有力的寅木合住，壬水日主由旺變成弱，身弱財旺特徵係好多事情都唔可以自己掌握，預算唔到結局，即係好多事都會出乎自己意料之外，所以天生應變能力好快。財旺身弱之命，性格係幡扞燈籠，照遠唔照近，其他人有事搵幫忙，（例如朋友，甚至毫不相干人士都樂意幫忙，）但係自己人尤其是屋企人就懶懶閒。（因為財星本性向外，印星向內，財星破印自然偏向外人多過自己人）
壬庚辛丙
午子丑子
性格：
四柱多合又金生水旺，外貌俊秀，聰明反應快，外緣佳。食傷強旺，口多手多，泄日主太過，只有食傷而無財，雖然有官煞，但又沖又合，食傷與官煞之間並無財星通關，食傷之力只想生財，所以本命天生花心，日主受食傷所左右，性格風流好色，一生艷遇多。
食傷強旺剋制官殺，心中並無道德倫理觀念，更加無分辨是非能力，印星不得用，亦無家庭無責任感，賺錢僅供自己花用，少有顧及妻子兒女。正印格逢貴人（甲戊庚牛羊），文才佳，頗受上司器重，原局有火，心性尙算仁厚。
癸丁甲庚
卯酉申寅
性格：
八字中庚金正財最爲強旺，因此正財的特性也最爲明顯。生性誠樸節儉，負責盡職，勞碌之命。爲人正派，不善言辭。金性屬剛，個性隱含剛強的一面。甲木正印天透地藏，但被正財天剋地沖，因此正印之力無從發揮。爲人剛硬，樣樣執到正，不苟言笑，因傷官藏於申寅之中，寅申係四生位（生方怕動），沖就散晒，所以性格完全唔圓滑，亦都無幽默感，唔可以同佢講笑，家人偶爾講錯一句話就會嘈到拆天，一家為咗唔想嘈吵，所以免得過都唔講野。