八運的天機

有人知道天機嗎?

風水為一般人熟悉的年代係六運轉上七運嘅時候,在六運中,一般人只認識算命,卜卦,對風水只係留存在少數人口中,唔掂?睇下風水啦,作為順口講吓。但到七運之後,風水突然間大行其道,當然同地運有關,但亦都同大多數人去做同一樣嘢有好大關係,就係借用佛家所講嘅(共業)。

社會形態的方向,就係跟住大多數人嘅意願而行。五術之道在於預測(馬前炮),並不是等發生了某一件事之後再放馬後炮,但馬後炮風水師多的是。

我係一個風水從業員,亦不例外希望有能力放馬前炮,但做這個動作之前,除了有一定的術數知識之外,更加要有足夠嘅膽量,好多人唔知道點解要夠膽,原來唔講真係唔知,術數師係好怕輸嘅,就係要有輸得起的膽量,所以好少人夠膽放馬前炮。    什麼今年會有大型水災,火災,瘟疫,交通意外等等,但從來冇話乜嘢位置,乜嘢時間等等,因為如果講實咗,就實在輸唔起,所以多數都係模模糊糊地,今年有乜,今年有物,一大堆講咗等於冇講,到發生咗之後就大事宣揚,我都話咗架啦,其實天災人禍從未停過。

風水教師最鍾意預測,八運會點,有乜嘢發生,例如八運係艮卦,五行屬土,就自然係樓宇價值大升,艮卦代表男性,係男性之中的少男為主,自然係男仔話事,艮卦代表手或者用手做嘢,艮卦在元旦盤上係八白,九星之中的一白,六白,八白被視作三白吉星,唯獨是八白被視為財星,根據以上咁多樣嘢加埋,就引申為在八運裏面男仔好勤力,用手嚟做嘢,會搵好多錢,在八運前半段並不順利,要到後半段才開始好轉,其他的預示就係本地嘅地標係飛鵝山,而飛鵝山係數一數二藥材多嘅山,所以亦引伸為為醫者,在這個運裏面可以大展鴻圖(自然係好多人病)。

望返轉頭判斷每一樣都啱,都有出現,但竟然係後生仔好叻,搵好多錢,有大展身手機會,亦都係好多人病,醫藥好發達,持有物業者身家大漲,樣樣都同預測一模一樣,但係開心嗎?八運艮卦以陽土為本(中國名言,有土斯有財)引伸為土為財星,地標係飛鵝山,這個山的型格係山前巖巉,山後貧瘠,自然會令到一個地方嘅經濟只有越嚟越差,幾時先至有好轉,實在天曉得。

由七運望向八運,可以講係大方向冇錯,但係細節就差好遠,點解?因為冇人知道天機,連孔明都唔知天機,何況係一個小小嘅風水從業員?但只要夠膽輸,繼續放馬前炮,綜合經驗,就自然越嚟越準,經驗係錯出嚟嘅,所以唔好驚錯,最主要係累積經驗。