九運第三年

九運第三年（一）

丙己庚丙
寅酉寅午

不經不覺進入九運第三年，這一年有個好靚嘅名（赤馬），先放下赤馬這個東酉，睇下呢個格局，己酉日配庚寅月（是為正官格），又喺丙午年，加埋丙寅時，寅午相合成為火局，有兩個丙火正印透出，成火強土弱，主位係己土，坐於酉金食神上面，有庚金傷官透出，成個格局就係印重身輕，這一年好不幸，最弱的己土係主體，自坐酉金食神，加上庚金傷官，可以解成傷官有力，面對週邊無財星的環境，一般人就算有才幹都無用（火強金弱會飛都無用），呢一年作為普通階層，用一句說話就可以講晒，有姿勢無實際，一般人唔多唔少都會啲才幹，由執紙皮到某個行業技工，都係專業的一種（由執紙皮到餐廳侍應到洋行經理都係專業），丙午年所顯示的就係有足夠的才幹，去做自己的行業，但所熟識的行業無咁多職位（紙皮都無得執，因為執紙皮嘅人太多，紙皮太少），其他較高層嘅職位都係一樣（小學生都識嘅成語:僧多粥少）想搵錢嘅人多，但市場錢太少。這一年火極旺，火旺表示唔穩定，亦都產生另一個現象，就係長工愈來愈少，多數都係鐘點工，又產生另一個現象，就係無安全感（今日收工唔知明日仲有無工返），命理格式就係傷官有力但無財。原局庚金剋木，現實生活就係自己有才幹，可以唔將老闆睇在眼內（傷官制官），但睇哂成個組合，就變成印制食傷，無財星制印（無水剋火），本年以水為財，成個格局一點財星都無，真可憐（做來做得個吉）。原局無財就只有求諸月令，由正月庚寅至十二月辛丑，都無一個真真正正嘅財星出現，預示一般階層生活愈來愈困難。在火太強，土太弱的環境下，可以睇到的低端人士抱住不理世間事，只係耷低頭做野，都唔可以太太平平地渡過這一年，點算好呢？少數高端人士就有轉寰餘地，就係乖乖的聽話就得，但係其他大部份低端人士連想聽話的資格都無。

睇晒以上嗰七百多字，係唔係覺得好灰呢，可以話俾大家聽實際無咁差，之所以覺得好差嘅原因，係因為一般人唔知命，了解咗命格就自然可以趨吉避凶，簡單一句話就係識走位。

九運第三年（二）

世界大戰都咁多人無死，只要知命，同埋識走位，自自然然就趨吉避凶，赤馬紅羊真係咁得人驚咩？多餘。

現在由十二生肖開始講（因為淺白啲，講又容易，聽又容易啲），首先屬鼠的人：因為原局五行欠水，所以屬鼠的人在這一年裡面好受歡迎，但亦好大壓力，原因係個個都想喺佢身上搵著數，因為屬鼠的人喺呢度係擔任財星角色，肯定會有好多人想搵佢幫手，無論係金錢或者係人事方面，都係有去無回，因為強火剋弱金，金可生水，喺屬鼠嘅人立場，金係印星，弱小嘅金受強火所剋，印星嘅力無從發揮，引伸出來就係無道德觀念，所以屬鼠的人肯幫人，但唔會有回報，尤其是75年嘅鼠人，每幫一個人就多一個仇人，點樣做就自己決定。

屬牛的人，這一年有強火生助，換一個角度來睇，即係有貴人出現，亦都係才幹的表現，在這一年有機會發揮自己才幹，最好就係同屬雞的人合作，如果有得揀的話，首選05年的後生仔拍擋，必定合作愉快，唔一定做生意嘅，就算同埋一齊去玩，都會開心啲。

屬虎的人，在這一年必定會做好多蝕底野，最好唔埋堆，不論做生意或任何事，埋堆肯定無好結果，原局火強，入局就會泄弱自己能力，包括金錢，時間，人事資源，唔使望有回報，尤其是74年的老虎，同佢合作就等於擔沙塞海，多多都無回頭（因為老虎係孤獨精）。

屬兔的人，呢一年會有好多受傷機會，推算係骨折嘅機會最大，尤其是過馬路，無時無刻都要小心加小心（唔係講笑，陰金剋陰木，必有意外），最要小心就係八月同九月，其中以九月最危險，除咗行路要帶眼之外，仲要留心身邊的朋友，這一年同06年出生屬狗的人一齊係無著數嘅，自自然然會令你破財，不要掉以輕心。

屬龍的人，辰與酉合，今年會無端端出現想創業的念頭，但係大環境唔俾機會，所以都鏡花水月，辰酉合化金，因為財歸庫，計劃一大堆但無行動，到時自然有好多藉口打退堂鼓。今年水歸庫強火剋水，膀胱有病的機會好大，及早檢查有好無壞。

屬蛇的人，與原局又合又刑（撞得板多就自自然會圓滑），這一年如果識變面，生活會慢慢改善，但在木火大旺的環境下都無從表現，同時今年破財的機會最大，因為本來係財星破印（水剋火），到六月一定要掩實個荷包，雷劈都唔好打開，就算想捐錢做善事都要留番下一年再捐多啲。火多土焦，小心唔好食咁多甜野。

屬馬的人，火勁強，有能力的話一定要出外走一轉，因為強火生土，會令自己混混沌沌，喺別眼中就係傻下傻下。盡可能不要同屬鼠的人走埋一齊（沖得最勁），仲有同屬鼠的人合作就會有好多是非，唔係同屋企人口角咁簡單，嚴重嘅有可能離家出走，其中以屬鼠的女人同屬鼠的男人(72年)來往就最差。同時這一年亦都好多病，乜野病不好判斷，總之火多土焦肯定無乜好事出現，只有勤驗身一個方法可解決問題。

屬羊的人，十二個生肖之中數一數二差，未中所藏的雜氣完全係剋制金水，成個格局都無生氣，試圖用天干配對，用乙丁己辛癸來配未土，無一個係好嘅，所以就有赤馬紅羊劫之說，所差的應該係同錢有關，都係嗰一句古老話，想搵錢的人多，市場的錢大少，所以必定產生爭執，呢一年有兩種人係天敵，第一係甲午日出生的人，第二係丙戌日出生的人，一般人唔知自己邊日出生，可用ＡＩ去搵，屬羊的人遇到呢兩種人最好避之則吉。

屬猴的人，申酉，寅午對沖，先天性火土剋金水，自然係無晒生氣，但係有方法化解，就係一個動字，只有多動，將申中金水引出，就自然將凶象化解於無形，動者。包括旅行（最好向西行），運動最好係游泳，如果地面運動一定要大汗淋漓，求其郁幾下係無意思嘅，遇到屬老虎的人就要小心，其中以86年嘅老虎就要避開下。

屬雞的人，雞係弱金，但呢啲人有一定的處世手腕，丙丁火剋金，尤其係丙火，無堅不摧，但係遇到屬雞的人就惡唔出樣，屬雞的人在這一年會有好大發展，如果對手係屬虎的詁（生意或運動場），真係拾有九勝，但對手係屬免的話，就要小心，多數都會蝕底俾佢。

屬狗的人，呢一年只有好無衰，因為呢一年火炎土燥，戌係火庫，火歸庫，即係唔會周圍點著火頭，凡有爭拗的場合，只要有屬狗的人在其中，是非會好快會平息，亦有好好的財運，所以這一年最好多啲同屬狗的人來往（只係今年，明年唔好啋佢），因為明年係丁未年，壬寅月，甲寅日，乙巳時，屬狗的人無哂優勢，所以趁今年財運好就搵得就搵，點樣可以搵多啲呢，好簡單，商場有一句名言（只要唔怕醜就天下無敵），放低個面子就得，但今年夏天屬狗的人會好辛苦，真係火炎土燥唔會變嘅，要化解就好簡單，買黃金放在手袋就少啲病痛（唔係講笑嘅）。

屬豬的人，這一年明合暗合，正式係左右逢源，無論對自己有無實質益處，人緣最好嘅生肖，得人緣係做任何事成功的起點，豬嘅五行係水，呢一年正式係人見人愛，其中最主要係呢種人思想正面，真係有正能量（如果身形稍肥更好），會令到接近自己的人都開心，將周圍的負面情緒沖散，呢一年木火土旺，自然係無生氣，有金水出現就會令到大家都開心，同時水有動象，所以周圍走動就會消除炎燥之氣，最好多啲去遠頂（向北）。

九運第三年（三）

五行裡的木火土金水各有特性，其中以火五行最為霸道，當任何一種動物發起火來都會迷失本性，我哋係人類，對其他物性並不了解，連最親密的寵物都唔知佢諗乜，但人發起火來就真正唔係人咁品。在中華大地上面的九紫火運並不是一個好的地運，首先就係火炎土燥，中華大地盤古初開就係缺水，炎黃子孫的紀錄就係一本爭奪水源的歷史。

火運即係火最強，火炎土燥自然忌木來生火（五行裡最強的自然係忌神），所以對木五行絕對排斥，既然木五行係忌神，生活在這片土地上的人，第一就係缺乏咗道德觀念，當大部份人都將木五行當忌神的狀況下，好肯定宗教的影響力就愈來愈少，跟住就係缺乏慈悲心，當大部份人都缺少道德觀念，又無慈悲心，就剩番追名逐利之心，但本地並無水源（連日常飲用水都要倚靠其他地方供應），當在利益面前，任何道德人情都要靠邊站，正式係呃得就呃，搶得搶。

火炎土燥的地方，自然缺水，而本地偏偏就係以水為財，加上本地人口愈來愈多（好不幸低端人口佔大多數）（無直接納稅者，間接稅不計在內），即係攞錢的人愈來愈多，不單止本地如此，其他地方都有同樣情況，因為九紫火不單止覆蓋這個一針之地，所以就算離開本地都未必會有改變。

火炎土燥不會只係制水五行，連金五行都剋制住，九紫火直接剋制水（五行無絕對，強者勝），水為財，水主智力，水主靈活，水亦主溝通，方位係北方，流年丙午，地運加流年，火氣自然覆蓋大地。今年一般低端人士想搵錢的確有難度，連社會秩序都比其他年份差，因為火除却剋水之外，仲直接剋住金五行，火剋金在社會層次就係無秩序，自動守法的人愈來愈少，就只有用罰則來逼使一般人守法。

金五行代表紀律，守法，義氣，樂助弱小，當金五行被剋到盡之時，社會秩序就自然慢慢消失，當領導人覺得管治有困難時，就好自然會立更嚴厲的律法，以加強管治能力，令一般低端人物發覺生活愈來愈困難。火剋金在現實環境中就會漸漸唔守法，唔守規矩的人多起來，尤其是屬金五行的人，會覺得呢個世界愈來愈多野唔順眼，同自己的理想距離愈來愈遠，但好可惜五行水被剋到盡，令金五行的人才幹無從發揮。

高端人士搵錢能力漸漸下降（才幹無從發揮），低端人士更差，因為呢個已經唔係佢哋嘅世界，想離開又無能力，留下又唔開心（無中端人士，因為呢個世界無中間嘅，唔係我呢邊就係對立面），如果夠長命可以等到2031就可以有轉機（唔係轉運，只不過磨到無晒角啫）。

九紫火運裡面屬土五行的人較為幸運，因為九運係強火生土，做野自然有持無恐，土五行特性係穩重，中正，蓄藏，有量度，可容納不同意見，但九運的九紫火並不是一般的火，係可以焚毀萬物的無情火（火多土蕉），令土五行無晒中正之氣，只有蓄藏，引伸為九運多貪墨之人，連以前能守正道的人，到了九紫火運都變得不同了，土焦難容他物，產生篤背脊的動作愈來愈多`，因為焦土自然要水（即係要財），好順理成章地不擇手段搵錢（因為市場錢太少，才要不擇手段），火勁強自然無咗中正之氣，自然會產生不中不正之事。現實社會上自然會有好多恃勢凌人之事，不公平之事。

九運係九紫火，流年係丙午火，大運隨流年而轉，正是丙火猛烈，欺霜悔雪，表面睇火五行的人好公正，不畏強權，但中華大地土強水弱，只有炎燥之氣，不得地潤天和，自然人緣極之差，在九運的第三年，好容易講過頭說話，樣樣自以為是，得罪人多稱呼人少（火主禮，過籠就係禮不全），這一年裡面火五行的人最差，火旺的人仲差，強火遇火的人最要小心，最容易犯法（雖然有啲地方有法唔執法，都係小心啲好）。

強火遇木的人最差（身邊的人會好心做壞事）。

強火遇水的人最差（會做啲不自量力的事）。

強火遇金的人肯定無錢剩（比劫爭財想剩錢都難）。

強火遇土的人會目空一切（自大）。

上面所寫的只不過係一般人會出現的狀況，可能你唔係一般人呢，所以無需太過著意。

呢一篇文字需要對命理有小小認識，才可以睇到裡面嘅深層意思，但我無打算解釋，因為任何事睇得太清楚係好無癮嘅，就照字面睇就得。